Petropavlda araq-sharap ishken 50 jasóspirimniń ata-anasy aıyppul tóledi
Soltústik Qazaqstan oblysy polıtsııa departamenti baspasóz qyzmetiniń málimetinshe, jańa oqý jyly bastalǵaly ıývenaldyq polıtsııa qyzmetkerleri túngi reıdterdi jıiletken. Tártip saqshylary túngi kóshelerdi aralap, kompıýterlik klýbtar, sondaı-aq aýlalar men tuıyq kóshelerdi nazarǵa alǵan.
Petropavlda polıtseıler «Nazar aýdaryńyz, balalar!» is-sharasy aıasynda qyrkúıektiń 1-nen 2-ne qaraǵan túni Qazaqstan Konstıtýtsııasy kóshesinde júrgen 11 jasóspirimdi anyqtaǵan. Olardyń ata-analary QR Ákimshilik quqyq buzýshylyq týraly kodeksiniń 442-baby 2-bóligi «Kámeletke tolmaǵandardyń zańdy ókilderiniń erip júrýinsiz túngi ýaqytta oıyn-saýyq mekemelerinde nemese turǵynjaıdan tys jerde bolýy» boıynsha jaýapqa tartyldy.
«Tártip saqshylary jedel-profılaktıkalyq is-shara barysynda jasóspirimderdiń túnde júrýiniń 13 faktisin anyqtady. Eki balanyń spırttik ishimdik ishkeni belgili boldy. Oqý oryndarynda profılaktıkalyq jumystar júrgiziledi, balalarǵa quqyq buzýshylyqtyń saldary, nashaqorlyq qaýpi, jolda jáne qoǵamdyq oryndarda qaýipsiz júris-turys erejeleri týraly aıtylady. Turmysy qolaısyz otbasylar turaqty baqylaýǵa alynǵan», - deıdi Petropavl qalalyq PB JPQ ıývenaldy polıtsııa bólimshesiniń bastyǵy Elmıra Abýsheva.
Jyl basynan beri Petropavlda túrli quqyq buzýshylyqtar úshin 750-den astam zańdy ókil jaýapkershilikke tartyldy. Onyń 550-i kámeletke tolmaǵan balalardyń túngi serýeni úshin, 50-i jasóspirimderdiń spırttik ishimdikter ishkeni úshin jaýapkershilikke tartyldy. Sonymen qatar, jasóspirimderdiń túngi ýaqytta bolýyna jol bergen oıyn-saýyq mekemeleriniń 12 ıesi jaýapkershilikke tartyldy.