Petropavlda 9,5 myń turǵyn qoǵamdyq kólikte tegin júretin boldy

PETROPAVL. QazAqparat – Petropavlda 12 sanatqa jatatyn azamattar qalalyq qoǵamdyq kólikte tegin qatynaıdy. Máslıhat depýtattary búgin osyndaı sheshim qabyldady, dep habarlaıdy QazAqparat tilshisi.

Jetinshi shaqyrylymdaǵy Petropavl qalalyq máslıhatynyń kezekten tys 3-shi sessııasynda depýtattar halyqtyń osal tobyna qoǵamdyq kólikte tegin júrýge ruqsat berdi.

Petropavl qalalyq ákimdigi jeńildikpen júretin azamattardyń tizimin jasady. Oǵan 12 sanatqa jatatyn 9,5 myń turǵyn kirip otyr.

Olar: 1-2 top múgedekteri, 16 jasqa deıingi múmkindigi shekteýli balalar, barlyq toptaǵy 16 jastan 18 jasqa deıingi múgedek balalar, 18 jasqa deıingi múmkindigi shekteýli balany tárbıelep otyrǵan zańdy ókili, UOS ardagerleri jáne olarǵa teńestirilgender, basqa memleketter aýmaǵynda urys qımyldarynyń ardagerleri, «Altyn alqa», «Kúmis alqa» ıegerleri, buǵan deıin «Batyr ana» atanǵan kópbalaly analar, kámelet jasyna tolmaǵan 4 jáne odan kóp balasy bar otbasylardyń bir zańdy ókili, sonyń ishinde kolledjde jáne ýnıversıtette kúndizgi bólimde oqıtyn 23 jasqa deıingi stýdentter, saıası qýǵyn-súrgin qurbandary, az qamtylǵan otbasylardyń zańdy bir ókili, kóp balaly otbasylardyń, az qamtylǵan otbasylardyń mektep jasyndaǵy balalary.

«Petropavl qalalyq ákimdigi jeńildikpen júretin jolaýshylar úshin tasymaldaýshylarǵa ótemaqy tóleıdi. Al qoǵamdyq kólikte tegin júrý quqyǵyna ıe bolǵandarǵa fotosy bar arnaıy karta jasalmaq. Bul olarǵa qosymsha qujatsyz jol júrýge múmkindik beredi. Turǵyndar tegin shekteýsiz júrip-tura alady. Eger karta joǵalyp nemese iske jaramaı qalsa, onda kartany ekinshi ret aqyly túrde jasatady. Jeńildik kartasy ótinish berý arqyly jasalady», - deıdi Petropavl qalalyq turǵyn úı-kommýnaldyq sharýashylyǵy, jolaýshylar kóligi jáne avtomobıl joldary bólimi basshysynyń orynbasary Baqyt Ilıasov.