Petropavlda 50 shaqty turǵyn evakýatsııadan bas tartty
PETROPAVL. KAZINFORM — Petropavl mańynda Esil ózeniniń sýy kóterilip keledi. Sońǵy málimet boıynsha arnasynan shyǵýyna jarty metrdeı ǵana qalǵan. Qaýiptiń jaqyndaǵanyna qaramastan, turǵyndardyń keıbiri úılerin tastap kóshýge qarsy.
Petropavldyń shetki aýdanynda ornalasqan Zarechnyı kenti — tasyǵan ózen sýy jaıylatyn qaýipti aýmaqta tur.
Birneshe kúnnen beri munda turǵyndar qaýipsiz jerge shyǵarylyp jatyr. Qazir bul aımaqty polıtsııa men qutqarý qyzmeti qyzmetkerleri kezekshilik etýde.
Olar turǵyndardy qaýipsiz jerge kóshirip, al úılerinen ketkisi kelmeıtindermen túsindirý jumystaryn júrgizedi.
AMANAT partııasy SQO fılıaly baspasóz qyzmetiniń málimetinshe, búgin Májilis depýtattary da basyn qaýipke tigip, kóshýden bas tartqan úı ıelerimen júzdesti.
Qazirgi tańda 47 turǵyn evakýatsııadan bas tartyp otyr.
Sondaı-aq, mundaǵy 50 úıdiń ıesi áli tabylǵan joq. Jalpy Zarechnyı aýylynda barlyǵy 900 adam turady.
«Biz sizder úshin alańdap otyrmyz. Eń bastysy — adam ómirin saqtap qalý jáne apat zardaptaryn azaıtý. Múlikterińizge eshkim tıispeıdi. Ol jaǵynan ýaıymdaýdyń qajeti joq. Munda táýlik boıy polıtsııa qyzmetkerleri, qutqarýshylar kezekshilik etedi. Aýyl qorshalǵan, beıtanys adamdar kirmeıdi», — dedi Májilis depýtaty Baqytjan Bazarbek.
Bul kúni depýtattar Petropavl sý torabyndaǵy jaǵdaımen de tanysyp, Oıqala jáne Bylǵary zaýyty kentindegi bógetke baryp, evakýatsııalyq pýnktte turyp jatqan adamdarmen áńgimelesti.
Qazir Petropavl sý qoımasynyń sý deńgeıi jarty metrge kóterilgen. Búginde qyzyl sý Petropavlǵa joǵary jyldamdyqpen kele jatyr.
Buǵan deıin sý tasqynyna baılanysty 7 mektep oqýshylarynyń qashyqtan oqyp jatqanyn aıtqan edik.
