Petropavlda 3 jasar balanyń kózine pyshaq kirip ketti

PETROPAVL. KAZINFORM — Petropavlda dárigerler pyshaq jaraqatyn alǵan balanyń ómiri úshin kúresip jatyr.

Oqıǵa keshe tús shamasynda bolǵan. Kópbeıindi oblystyq balalar aýrýhanasyna jedel járdem qyzmetimen aýyr halde, esin joǵaltqan 3 jasar bala jetkizildi. Sábıde kóz sharasy zaqymdanǵan pyshaq jaraqaty bolǵan. Anasy dárigerlerge balanyń as bólmesinde oryndyqtan qulap, kózine pyshaq kirip ketkenin aıtty.

— Bala jansaqtaý jáne qarqyndy terapııa bólimshesinde barlyq qajetti emdi alyp jatyr. Jaǵdaıy óte aýyr, sol jaq kóz uıasy aımaǵynda jarasy bar. Qajetti dıagnostıkalyq tekserister, dárigerlerdiń konsılıýmdary júrgizilip, ashyq bas-mıynyń jaraqaty, aýyr dárejedegi mıdyń soǵylýy dıagnozy qoıyldy. Travmatıkalyq shok alǵan. Bala mıyna birneshe ret dınamıkada kompıýterlik tomografııa jasaldy. Onyń nátıjeleri boıynsha hırýrgııalyq emdeýden bas tarttyq. Birneshe kúnnen keıin qaıtadan KT jasap, jaǵdaıyn kóremiz. Qazirgi ýaqytta bakterııaǵa qarsy, ınfýzııalyq-transfýzııalyq, gemostatıkalyq jáne isinýge qarsy, sımptomatıkalyq terapııa júrgizilip jatyr, — deıdi kópbeıindi oblystyq balalar aýrýhanasynyń dırektory Nurlan Aımanov.

Polıtsııa qyzmetkerleri balanyń jaraqat alý faktisi boıynsha mán-jaıdy anyqtaý jáne protsestik sheshim qabyldaý úshin tekseris júrgizip jatyr. Bul derek Petropavl qalalyq polıtsııa basqarmasynyń aqparatty esepke alý kitabyna tirkeldi. Aldyn ala málimet boıynsha, bala úı jaǵdaıyndaǵy jazataıym oqıǵa nátıjesinde jaraqat alǵan.

Buǵan deıin Petropavlda dárigerler jas jigittiń júreginen temir tikendi alyp shyqqanyn jazǵan edik.