Petropavl turǵyny ońaı tabysqa kenelemin dep 545 myń teńgesinen aıyryldy
Soltústik Qazaqstan oblysy polıtsııa departamenti baspasóz qyzmetiniń málimetinshe, Petropavl turǵyny ınternette «qarajatty eseleımiz» degen habarlandyrýdy kózi shalady. Tekserip kórmek bolyp, usynylǵan saıtqa tirkelgen. Kelesi kúni oǵan WhatsApp messendjerine habarlasyp, jobaǵa qatysý úshin 150 myń teńge salý qajet ekeni aıtylǵan.
Er adam shaǵyn nesıe uıymynan zaım resimdep, alǵan qarajatyn alaıaqqa aýdarǵan. Kóp keshikpeı ony 50 dollar tabys taptyńyz dep qýantady. Qyzyqqa berilgen ol qosymsha taǵy qarajat salady, al uıymdastyrýshylar er adamǵa «dıvıdendteri» kórsetilgen kestelerdi joldap otyrǵan.
Jábirlenýshi aldanǵanyn sezip «tabysyn» talap etken. Alaıda, alaıaqtar tabys alý úshin taǵy da salym salý kerek degen. Aqyrynda 545 myń teńgesinen aıyrylǵan er adam polıtsııaǵa júgindi. Atalǵan fakti Qylmystyq kodekstiń 190-baby «Alaıaqtyq» boıynsha sotqa deıingi tergep-tekserýlerdiń biryńǵaı tizilimine engizildi.
«Internet qoldanýshylaryna jelidegi «qarajatty jyldam eseleýdiń» túrli amaldaryna, qarjy pıramıdasynyń kórinisteri bar uıymdardyń usynystaryna senbeýdi eskertemiz. Sondaı-aq, ınternet arqyly taýar ne qyzmet satyp alarda aldyn ala tólemge kelispeńizder. Al logın, qupııa sóz, bank kartalarynyń kodtary, sms-habarlamamen keletin bir rettik kodtar sııaqty aqparattardy qupııa ustaý qajet. Bul aqparattardy eshkimge habarlaýǵa bolmaıdy. Esterińizde bolsyn, ınternet alaıaqtyqtan qorǵanýdyń negizgi joly – jeke málimetterińizge uqypty qaraý», - deıdi SQO PD Krımınaldyq polıtsııa basqarmasynyń bastyǵy Marat Jumalıev.
