Petropavl turǵyny áleýmettik jelide dinı mazmundaǵy aýdıofaıldardy taratqan

PETROPAVL. QazAqparat – Petropavlda áleýmettik jelide ekstremıstik sıpattaǵy materıaldar taratqan áıelge aıyppul salyndy, dep habarlaıdy QazAqparat tilshisi.

Soltústik Qazaqstan oblysy Polıtsııa departamenti baspasóz qyzmetiniń málimetinshe, Petropavldyń 48 jastaǵy turǵyny «VKontakte» áleýmettik jelisinde dinı mazmundaǵy aýdıofaıldardy jarııalap kelgen. Muny monıtorıng jasaý barysynda Ekstremızmge qarsy is-qımyl basqarmasynyń qyzmetkerleri anyqtaǵan. Jazbalarǵa dinı saraptama jasalyp, onyń el ishinde alaýyzdyq týdyrýdy, qoǵamnyń dinı tutastyǵyn buzýdy maqsat etken, Qazaqstan aýmaǵyna kirgizýge tyıym salynǵan kitaptardy nasıhattaǵany anyqtaldy.

Petropavl qalasynyń mamandandyrylǵan ákimshilik soty aýdıojazbalarda talqylanǵan týyndylar ekstremıstik sıpattaǵy dep tanyp, áıelge 20 AEK mólsherinde aıyppul saldy.

SQO PD Ekstremızmge qarsy is-qımyl basqarmasynyń bastyǵy Rýslan Jarasbaevtyń aıtýynsha, «Dinı qyzmet pen dinı birlestikter týraly» QR Zańynyń 9-babyna sáıkes dinı ádebıetti, dinı mazmundaǵy ózge de aqparattyq materıaldardy, dinı maqsatta qoldanylatyn basqa da zattardy tek meshit-shirkeýlerde sondaı-aq jergilikti atqarýshy organdar arnaıy belgilegen oryndarda taratýǵa ǵana bolatynyn eskertedi. Qazirgi tańda SQO-da osyndaı ruqsaty bar 15 nysan jumys isteıdi.