Petropavl turǵyny alaıaqtarǵa 10 mln teńgesin berip qoıdy
Soltústik Qazaqstan oblysy polıtsııa departamenti baspasóz qyzmetiniń málimetinshe, 31 naýryz kúni Petropavl turǵynyna telefon arqyly bireý habarlasyp, ózin bank menedjerimin dep tanystyrǵan. Ol áıeldiń atyna iri nesıeniń resimdelgeni týraly habarlap, operatsııany rastaý qajettigin aıtqan. Áıel kelispegendikten, telefon shalýshy oǵan qazir qaýipsizdik qyzmetinen habarlasatynyn aıtqan.
Ekinshi qońyraý WhatsApp-tan túsken. Jábirlenýshige esepshotyna qatysty qolsuǵýshylyqty boldyrmaý úshin iri somada nesıe alyp, ol aqshany qosalqy shotqa jiberý qajettigin eskertken. Áıeldiń aıtýynsha, ol ınternet-alaıaqtyq týraly bilgen, biraq onymen resmı tilde sóılesken adam senimine kirgen. Budan bólek, áńgime barysynda ol bul faktige bank qyzmetkerleriniń qatysy bolýy múmkin ekendigin aıtqan.
«Alaıaq bank qaýipsizdigi qyzmeti tergeý júrgizip jatyr dep aıtqan, sondyqtan bankke barǵanda, «qylmyskerlerdi úrkitip almaý úshin» eshkimge eshteńe aıtpaý qajettigin eskertken. Qala turǵyny bankke baryp, 4,5 mıllıon teńgege nesıe resimdegen jáne óziniń jınaǵan qarajatyn qosyp, qylmyskerler aıtqan shotqa aýdarǵan. Budan keıin alaıaq áıeldi ekinshi bankke baryp óz atynan taǵy bir nesıe resimdeýge kóndirgen. Ol aqshany da «arnaıy esepshotqa» saldyrǵan», - deıdi SQO polıtsııa departamenti krımınaldyq polıtsııa basqarmasynyń bastyǵy Marat Jumalıev.
Tek birneshe kúnnen keıin ǵana Petropavl turǵyny alaıaqtarǵa aldanǵanyn túsinip, polıtsııaǵa júgingen.
«Atalǵan derek Qylmystyq kodekstiń «Alaıaqtyq» baby boıynsha Sotqa deıingi tergep-tekserýdiń biryńǵaı tizilimine engizildi. Jalpy shyǵyn - 10 mln teńgege jýyq. Adamdardy qandaı jaǵdaı bolmasyn, bankten shalynatyn qońyraýlarǵa senbeýge shaqyramyz. Eger qarajatyńyzdyń saqtyǵyna qatysty kúmán bolsa, bankke baryp, sol jerde anyqtańyzdar», - deıdi Marat Jumalıev.
SQO-da 3 aıdyń ishinde 214 ınternet-alaıaqtyq tirkeldi, onyń 40-ynda alaıaqtar ózderin «bank qyzmetkerimin» dep tanystyrǵan.
