Petropavl turǵyny óz qarajatyna aýlaǵa erekshe átkenshekter ornatty
PETROPAVL. KAZINFORM – Petropavl turǵyny Aleksandr Gýsev kópqabatty turǵyn úıdiń aýlasyna erekshe átkenshekter qurastyryp ornatty. Qaýipsizdikti basty orynǵa qoıǵan er adam jaqynda balalarǵa taǵy bir tartý jasap, ertegi keıipkerleriniń músinderin ornatpaq.
Átkenshektiń ereksheligi – ol toqpen aınalyp, 2 mınýttan soń toqtaıdy. Sondaı-aq ústindegi kolonkaǵa blıýtýz arqyly qosylyp, balaǵa ertegi, ne bolmasa, án qosyp qoıýǵa bolady.
«Qys boıy jumys istedi. Qazir kórshi aýlalardan da balalar keledi. Qasymyzda mektep ornalasqan, sondyqtan alań bos turmaıdy. Bala bolǵasyn oınaıdy, keıde birnesheýi minip, syndyryp ketedi. Qaıta istep, iske qosamyn.
Qazirgi ornatylyp jatqan átkenshekterdiń kópshiligi densaýlyqqa qaýipti, óıtkeni, qoldanysqa berilgen kezde belgili bir talap boıynsha tekserilmeıdi, ıaǵnı GOST joq. Sol sebepti aýlamdaǵy balalarǵa qaýipsiz, ári erekshe átkenshekter jasap bergim keldi. Reseıde kórgenim bar edi, mysaly, myna 3D «avatar» dep atalatyn átkenshektiń otyrǵyshtaryn kórshi eldiń zaýytynan tapsyryspen alǵyzdym. Sol sııaqty, ústindegi býyny joba boıynsha avtomobıl kardanynan jasalǵan. Ol tyǵyz qozǵalady, men ony ózimshe jetildirdim.
Uqsas átkenshekterde bir jaǵyndaǵy bala sekirip tússe, ekinshisi jerge qulaıdy. Al bul jerde ondaı qaýip joq, joǵary-tómen ǵana emes, jan-jaqqa qozǵalady», - deıdi Aleksandr Gýsev.
Balalardyń oıyn alańy joba boıynsha 20/20 metr jerdi alýy tıis. Byltyr kópqabatty úıdiń kezegi jetip, qalalyq ákimdiktiń baǵdarlamasymen alań jóndelýi kerek edi. Biraq, qala turǵynynyń aıtýynsha, ákimdik ókili kelip, qarap, «sizderde alań salýǵa qolaıly oryn joq» degen syńaımen ketip qalǵan. Keıin qansha ret habarlassa da, jaýap bolmapty.
Aleksandr Gýsev kezinde Petropavldaǵy qorǵanys zaýyttarynyń birinde eńbek etken. 1980 jyldardyń sońynda turmystyq tehnıka, sonyń ishinde «Romantık» magnıtofondaryn shyǵarǵan. Qazir ózi turyp jatqan kópqabatty úıde qoǵamdyq negizde páter ıeleri kooperatıvin basqarady.
«Qorǵanys zaýytynda jumys istedim, keıin kásiporyn quldyraǵannan keıin energetıka salasyna kettim. Maǵan tehnıkamen jumys isteýdiń túk qıyndyǵy joq. Men úshin osyndaı dúnıe jasaý – demalys, súıikti is desem de bolady. Negizgi jumysymnan qolym bosaǵan kezde aınalysamyn. Zeınetkermin, biraq shaǵyn kompanııany basqaramyn. Biz jylý pýnktterin, nasos stansalaryn jobalaımyz, salamyz, jóndeımiz», - deıdi Aleksandr Gýsev.
Qazir Alekseı aýlaǵa ornatýǵa shaǵyn músinderdi jasap jatyr. Berik, ári, zııansyz bolýy úshin qaýipsiz materıaldardy qoldanady. Osylaısha jańa jylǵa deıin ertegi keıipkerlerin ornatyp, balalarǵa tartý jasamaq.
Sheber kópqabatty úıge qoıylatyn jylý eseptegish qurylǵysyn da jetildirgen. Qazir ár turǵyn uıaly telefony arqyly tipti bir saǵat ishinde qansha energııany tutynǵanyn kóre alady.
«Barlyq arhıv osynda saqtalǵan. Qansha paıdalandy, anyq kórinip tur. ıAǵnı, tutynýshylar kommýnaldyq aqyny az tóleıdi. Páterlerde jaıly temperatýra saqtalyp, tereze ashyp, dalany jylytpaımyz. Muny qaladaǵy basqa úılerge de qoıýǵa bolady, tegin istep berýge daıynmyn. Biraq, ókinishke oraı eshkimge kerek emes. Qazirgi jylý eseptegish quraldarynyń qalaı esepteıtini kópshilikke beımálim. Mysaly kórshi úıge energetıkalyq kompanııanyń baqylaýshysy kelip, osy aıda sizder jylý úshin ár sharshy metrge osynsha tóleısińder dep aıtady eken. Al ol tsıfrdyń qaıdan kelgenin eshkim bilmeıdi. Bizde bári avtomattandyrylǵan», - deıdi Alekseı Gýsev.
Buǵan deıin jumystan bos ýaqytynda keste tigip, temirden túrli buıym jasaıtyn aýyl ákimi týraly jazǵan edik.
