Petropavl áýejaıy mańyzdy qonaqtardy qarsy alýǵa daıyndyq ústinde

PETROPAVL. QazAqparat - Petropavl halyqaralyq áýejaıy bıyl Qazaqstan men Reseı prezıdentteriniń áýe kemesin kútip alýǵa daıyndalýda, dep habarlaıdy «QazAqparat» HAA tilshisi.

Óńiraralyq yntymaqtastyq jónindegi XV forým bıyl Petropavl qalasynda ótip, týrızm taqyrybyna arnalmaq.

SQO jolaýshylar kóligi jáne avtomobıl joldary basqarmasynyń basshysy Beıbit Ismanov «QazAqparat» tilshisine mártebeli qonaqtardy kútip alýǵa áýejaıdyń daıyndyǵy týraly aıtyp berdi.

Onyń málimetinshe, áýe aılaǵyndaǵy perron-turaq 2-den 8-ge deıin ulǵaıtylmaq. Ol úshin 1 mlrd teńge kóleminde qarjy jumsalady.

 

Áýejaıǵa deıingi joldar da jóndeledi. Jobalyq-smetalyq jumystar daıyndalyp qoıǵan. 2016 jylǵy  jańǵyrtý jumystarynan keıin Petropavl áýejaıynyń kez kelgen sanattaǵy ushaqtardy qabyldaı alatyn múmkindigi bar.

Qazirdiń ózinde Petropavl qalasynan Astana, Almaty, Shymkentke ushyp barýǵa bolady. Reıster sýbsıdııalanady. Bıyl Almaty jáne Astana baǵyttaryna arnalǵan sýbsıdııa kólemi 71 den 222 mln teńgege ulǵaıtyldy. Shymkentke deıingi áýe baǵytyna respýblıkalyq bıýdjetten 169 mln teńge bólindi.

SQO jolaýshylar kóligi jáne avtomobıl joldary basqarmasynyń málimdeýinshe, 2016 jylmen salystyrǵanda 2017 jyly ushaq qyzmetin paıdalanatyn jolaýshylar sany tórt esege, ıaǵnı 4 myńnan 16,8 myńǵa deıin ósken.