Perýdiń eks-prezıdenti qamaýǵa alyndy

ASTANA. KAZINFORM — Perý soty eks-prezıdent Martın Vıskarrany para aldy degen aıyppen bes aıǵa túrmege qamaý týraly úkim shyǵardy, dep habarlaıdy Al Jazeera. 

Sot otyrysynda sýdıa Horhe Chaves qashyp ketedi dep, Vıskarrany qamaýǵa alýǵa buıryq bergeni habarlandy. Oǵan 11 jyl buryn Mokýegýa okrýginiń gýbernatory bolyp qyzmet atqarǵan kezde para aldy degen aıyp taǵylyp otyr.

Vıskarra taǵylǵan aıyptardy joqqa shyǵaryp, olardy saıası qýdalaý dep ataıdy. Ol 2026 jyly taǵy da prezıdenttik saılaýǵa túsýdi josparlaǵan. Maýsym aıynda sot ony qamaýǵa alý týraly birinshi ótinishti qabyldamaı tastaǵanymen, prokýratýra qashý qaýpi bar dep, sheshimge shaǵym túsirgen.

Vıskarra — sońǵy jyldary sybaılas jemqorlyq pen saıası tolqýlarǵa toly Perýde qamaýǵa alynǵan besinshi eks-prezıdent. Elde 2018 jyldan beri alty ret prezıdent aýysty. Taǵy 3 eks-prezıdent — Alehandro Toledo, Ollanta Hýmala jáne Pedro Kastılo — qazir Lımadaǵy burynǵy memleket basshylaryna arnalǵan arnaıy túrmede otyr. Parlament 2020 jyly qyzmetinen shettetken Vıskarrany da sonda ustaý josparlanǵan. Túrme bastapqyda 2009 jyly adam quqyqtaryn buzǵany úshin 25 jylǵa sottalǵan eks-prezıdent Alberto Fýhımorıge arnalyp salynǵan. Ol 2023 jyly halyqaralyq sottyń sheshimine qaramastan raqymshylyqpen bosatylyp, bir jyldan keıin qaterli isik aýrýynan qaıtys boldy.

Eske sala keteıik, Perý elinen 3800 jyldyq ejelgi qala tabyldy.