Perýdyń burynǵy prezıdenti Vıskarra 14 jylǵa sottaldy

ASTANA. KAZINFORM — Perý soty eldiń burynǵy prezıdenti Martın Vıskarrany 2011-2014 jyldar aralyǵynda ońtústiktegi Mokegýa aımaǵynyń gýbernatory bolǵan kezinde para alǵany úshin kináli dep taýyp, 14 jylǵa bas bostandyǵynan aıyrdy. Bul týraly ANEWZ agenttigi jazdy.

Anyqtalǵandaı, Vıskarra qurylys fırmalarynan 676 myń dollar alǵan. Kompanııalar qoǵamdyq jumystarǵa kelisimsharttardy utyp alý úshin para bergen.

Eks-prezıdent byltyr qazan aıynda bastalǵan sot protsesinde ózin «saıası qýdalaýǵa ushyradym» dep ózine taǵylǵan aıypty moıyndamady. Ol 2018 jyly ózinen burynǵy prezıdent otstavkaǵa ketkennen keıin el basqarǵan. Biraq eki jyldan keıin sybaılas jemqorlyqqa qatysty tergeýiniń nátıjesinde Kongress qyzmetinen shettetildi.

Bul úkim sybaılas jemqorlyq úshin túrmege jabylatyn burynǵy Perý basshylarynyń tizimin tolyqtyrady. Qazir Alehandro Toledo men Olıanta Ýmala jazasyn ótep jatyr. Sondaı-aq Pedro Kastılo «búlik uıymdastyrdy» degen aıyppen qamaýda otyr.

Vıskarranyń advokaty Ervın Sıkcha sot sheshimine shaǵymdaný josparyn jarııalady.

Vıskarranyń isti bolǵanynan qaramastan, onyń aǵasy Marıo 2026 jyldyń sáýir aıynda bolatyn saılaýda Perý birinshi partııasynyń ókili retinde prezıdenttikke úmitkerler qatarynda tur.

Perý sońǵy jyldary saıası turaqsyzdyqty bastan ótkerip keledi. 2018 jyldan beri eldi 6 prezıdent basqarǵan. Olardyń deni jemqorlyqqa qatystylyǵy úshin bılikten shettetildi. Sot sheshimi memlekettik basqarý men eldegi esep berý máselelerine qatysty alańdaýshylyqty kórsetip otyr.

Osyǵan deıin Perýde keıingi 10 jylda jetinshi prezıdent aýysqany týraly jazdyq. Bıyl qazan aıynda Perý parlamentiniń jetekshisi Hose Herı jańa prezıdent retinde ant qabyldady.