Perýde keıingi 10 jylda jetinshi prezıdent aýysty
ASTANA.KAZINFORM – Perý parlamentiniń jetekshisi Hose Herı jańa prezıdent retinde ant qabyldady, dep habarlaıdy VVS.
Prezıdent retindegi alǵashqy sózinde Hose Herı eldegi qylmyspen kúresýge jáne saılaýdy ádil ótkizýge ýáde berdi.
Ol jeke basyna qatysty aıyptaýlardan keıin prezıdenttik qyzmetinen shettetilgen Dına Bolýarteniń ornyna keldi.
Bolýarteniń qarsylastary ony «únemi óz jumysyn oryndaýǵa moraldyq turǵydan qabiletsiz» dep aıyptady.
Tuńǵysh áıel prezıdent
Bolýarte 2022 jyldyń sońynda prezıdenttik bılikke kelip, el tarıhynda bul laýazymdy atqarǵan alǵashqy áıel boldy. Buǵan deıin ol burynǵy kóshbasshy Pedro Kastılo kezinde vıtse-prezıdent qyzmetin atqarǵan.
Onyń da prezıdenttik merzimi sybaılas jemqorlyqty aıyptaýdan jáne erkin saılaýdy talap etken jappaı narazylyqtardan bastalǵan. Bılik sherýge shyqqandardy kúshpen basyp, sonyń saldarynan 69 adam qaza tapqan edi. Al Bolýarte otstavkaǵa ketýden bas tartty.
Ótken jyly jergilikti La Encerrona basylymy Bolýartede qymbat saǵattar kollektsııasy bar ekenin habarlaǵan, olardyń qatarynda quny 6-14 myń dollarǵa deıin jetetin Rolex te júr. Al onyń prezıdenttik jalaqysy – 11 000 dollar.
Byltyr Bolýarte jalaqysyn kóterý týraly sheshim qabyldaǵannan keıin taǵy bir jemqorlyq daýy ýshyqqan.
Otstavkalar, aıyptaýlar jáne 5 kúnge sozylǵan bılik
2016 jyldan beri Perýde 7 prezıdent aýysty jáne osy ýaqytqa deıin olardyń eshqaısysy tolyq ókilettigin atqarǵan joq. Olardyń biri Manýel Merno 2020 jyly 5 kún ǵana bılik basynda boldy.
Perý prezıdentteriniń kóbi sybaılas jemqorlyq pen biliksizdigine qatysty aıyptaýlarǵa baılanysty qyzmetinen shettetilgen. Elde prezıdent pen Kongress arasyndaǵy kelispeýshilikter de jıi bolyp turady. Óıtkeni Perý Konstıtýtsııasy parlamentke prezıdentti «moraldyq qabiletsiz» degen aıyppen qyzmetinen bosatýǵa quqyq beredi. Bul túsiniksiz tujyrym bılik jolyndaǵy kúreste qoldanýǵa ábden qolaıly bolyp tur.
Jańa saılaý kelesi jyldyń sáýirine josparlanǵan.
Aıta keteıik, buǵan deıin Perý kongresi qaýipsizdik daǵdarysyna baılanysty prezıdent Dına Bolýartege ımpıchment jarııalaýǵa daýys bergenin habarlaǵanbyz.