Perý elinen 3800 jyldyq ejelgi qala tabyldy

ASTANA. KAZINFORM — Arheologtar Perýdiń ejelgi Penıko qalasyn tapty, onyń jasy shamamen 3800 jylǵa teń. Qala Perýdiń Ýaýra provıntsııasynda, el astanasy Lımanyń soltústiginde ornalasqan. Bul jóninde CNN habarlady. 

Ǵalymdardyń boljamynsha, Penıko b. z. d. 1800 jyldary qurylǵan. Qala, shamasy, jaǵalaýda ornalasqan eldi mekenderden bıik And taýlaryna jáne Amazonka ózeniniń boıyndaǵy qonystarǵa baratyn jol boıyndaǵy mańyzdy torap bolǵan. Arheologtar turǵyn úıler men qoǵamdyq ǵımarattardy qosa alǵanda, 18 nysandy anyqtaǵan.

Qoǵamdyq ǵımarattardyń birinen sazdan jasalǵan músinder, dinı saltanatqa arnalǵan zattar jáne «pýtýtý» dep atalatyn qabyrshaqtardan jasalǵan rásimdik trýbalar tabylǵan.

Penıko Amerıkadaǵy eń kóne órkenıetterdiń biri — Karal órkenıetiniń quldyraýynan keıin paıda bolǵan. Perýdegi dál osy attas eldi meken Karal-Sýpe ataýymen de belgili jáne b. z. d. 2600–2000 jyldar aralyǵynda gúldengen. Penıko qalasy gematıt (jarqyraǵan qyzyl untaq shyǵaratyn mıneral) saýdasynyń arqasynda damyǵan dep esepteledi. Bul mıneral keramıka men úńgir sýretterinde, sondaı-aq denege saltanatty belgiler salý úshin paıdalanylǵan.

Qazir Penıko aýmaǵy týrıster úshin ishinara ashyq. Qazba jumystary bul jerde 8 jylǵa sozylǵan.

Aıta keteıik, buǵan deıin Perýde 9 mln jyl buryn tirshilik etken akýlanyń súıekteri tabylǵanyn jazdyq.