Perızat Qaırattyń isi 100 tomnan asqan

ASTANA. KAZINFORM — Qarjylyq monıtorıng agenttigi tóraǵasynyń orynbasary Jeńis Elemesov Májilis otyrysynan keıin ótken baspasóz máslıhatynda Perızat Qaırattyń isi qandaı satyda ekenin aıtty.

— Bul is boıynsha qazir aıaqtaý satysynda turmyz. Jýyq arada tergeý materıaldarymen tanysý satysy bastalady. Tanysý satysy qanshaǵa sozylatynyn men aıta almaımyn. Óıtkeni bul protseske qatysýshylarǵa baılanysty. Qylmystyq istiń materıaldary aıǵaq zattardy qospaǵanda 100 tomnan asady. Qazir kúdikti qamaýda otyr. Qamaý merzimi uzartylǵan, — dedi ol.

Sondaı-aq, ol atalǵan is boıynsha Perızat Qaırattyń anasy da kúdikti ekenin atap ótti.

— Birinshiden, «alaıaqtyq» baby boıynsha aıyp taǵylyp otyr. Sondaı-aq, 218-bap boıynsha is qozǵalǵan. Bul qylmystyq jolmen alynǵan aqshany zańdastyrý máselesi. Birneshe epızod tergelip jatyr. Buǵan deıin onyń Palestınadaǵy jaǵdaıǵa baılanysty jáne tasqyn kezinde qaıyrymdylyq maqsatqa jınaǵan aqshalar boıynsha epızodtar tirkelgenin relızderde málimdegen edik. Qańtardyń aıaǵynda qosymsha epızodty qostyq. Bul epızod boıynsha ol múgedektigi bar balalarǵa arnalǵan ońaltý ortalyǵyn qurýǵa aqsha jınaǵan. Osylaısha 22 mln teńgedeı aqsha tartqan. Ol aqshany da jeke qajetine jumsaǵan. Búkil epızodtar boıynsha jınaǵan somany dóńgelektegende páter, jer úı, kólikter satyp alǵan. Onyń bárin, mekenjaıyn, kólik markalaryn buǵan deıin habarlaǵanbyz, — dedi agenttik tóraǵasynyń orynbasary.

Buǵan deıin Sot Perızat Qaırattyń dúnıe-múlkine shekteý qoıǵany habarlaǵan edi.