Pentagonnyń qupııa qujattaryn jarııalaý kúdigimen AQSh áskerı bazasynyń qyzmetkeri ustaldy
«Búgin tústen keıin FBR agentteri Teısheırdi eshqandaı kedergisiz tutqynǵa aldy», - dep málimdedi Garlend.
Onyń atap ótýinshe, Teısheır qorǵanys salasynda qupııalanǵan aqparattary «zańsyz shyǵarý, ıelik etý jáne taratý» kúdigine iligip otyr. Buǵan deıin Pentagonnyń resmı ókili general Pet Raıder baspasóz máslıhaty barysynda aqparattyń jaıylýy «qasaqana jasalǵan qylmystyq is» bolǵanyn málimdegen edi.
Kúdiktini tutqyndaýǵa onyń úıine saýytty kólikpen kelgen quqyq qorǵaý organynyń birneshe qyzmetkeri qatysty. Teısheır qarsylyq kórsetken joq, qolyn basyna qoıyp óz erkimen berildi.
Sál buryn amerıkalyq BAQ Ýkraınadaǵy soǵysqa jáne ózge de halyqaralyq isterge qatysty Pentagonnyń kóptegen qujatynyń jarııalanyp ketýine baılanysty jańa jaıttardy jazǵan bolatyn.
Sársenbi kúni keshkisin Washington Post áskerı bazanyń jas qyzmetkeri qupııa faıldardy oıyn chaty arqyly dostarymen bóliskenin jazdy. Al beısenbi kúni New York Times basylymnyń jýrnalısi atalǵan adamnyń aty-jóni men laýazymyn anyqtaı alǵanyn málimdedi.
Washington Post jarııalanymynda atalǵan adam qupııa aqparattardy oıynqumarlar arasynda tanymal Discord platformasynda «qarý-jaraqqa, áskerı jabdyqtar men Qudaıǵa súıispenshiligin» bólisetin múddelesteriniń shaǵyn tobyna usynǵany aıtylady.
Amerıkalyq eki sheneýnik New York Times gazetine tergeýshiler Teısheırmen jeke onlaın topqa úkimettik qujattardyń jarııa bolýy jaıynda sóıleskisi keletindigin rastady. Sheneýnikterdiń biri Teısheırde tergeýge qatysty bar aqparattyń bolýy múmkin ekendigin atap ótti.
Birneshe aı buryn paıdalanýshylardyń biri osy shaǵyn chat-topqa amerıkalyq barlaýdyń júzden astam betten turatyn qujatyn júktegen.
NYT Thug Shaker Central chat-tobynyń 4 múshesimen áńgimelesip, olardyń biri keminde 3 jyl buryn aqparatty jarııa etken adamnyń kim ekendigin biletindigin aıtqan. Ol onymen jeke kezdeskenin aıtyp, aty-jónin O.G. dep ataǵan. Dostary ol adamdy toptyń jasóspirim múshelerinen jasy áldeqaıda úlken ári sózsiz kóshbasshy dep sıpattaǵan. Sonymen qatar olardyń biri O.G. jumysynda barlaý qujattaryna qoly jetimdi bolǵanyn aıtady. New York Times top qatysýshylary kúdiktiniń aty-jónin aıtpaǵanymen, tsıfrlyq iz Teısheırdi meńzeıtindigin jazady.
Sársenbi kúni Discord málimetterdiń jarııa bolýyn tergeý barysynda quqyq qorǵaý organdaryna kómek kórsetetindigin málimdedi.
Buǵan qosa, boljamdy kúdiktiniń aty-jóni baspasózde beısenbi kúni jarııa etilgen edi. Al onyń aldynda ǵana AQSh Ulttyq qaýipsizdik keńesiniń ókili Djon Kırbı Bı-bı-sıge bılik ázirshe kúdiktiniń aty-jónin bilmeıtindigin aıtqan.
«Bul aqparattyń jarııa etilýiniń qaýipti tizbegi boldy. Olarǵa naqty kim jaýap beretindigin, muny nelikten jasaǵanyn bilmeımiz. Degenmen, munyń ulttyq qaýipsizdikke qandaı saldary bolatyndyǵyn baǵalaýǵa tyrysamyz jáne dál qazirgi ýaqytta qylmystyq tergeý júrgizilip jatyr. Túpki mánin búgeı-shigeıli anyqtap, ony kim jáne nelikten jasaǵanyn bilgimiz keledi», - degen edi ol sársenbi kúni.
«Vashıngton odaqtastarymen olarda týyndaǵan suraqtarǵa jaýap berý úshin , buǵan biz qanshalyqty baıyppen qaraıtyndyǵymyzdy kórsetý úshin aqparattardy belsendi almasyp otyrdy», - dep qosty ol.
Sonymen qatar Kırbı keıbir qujattardyń túpnusqa ekendigin anyqtaý qajettigin aıtty. Biraq, atalǵan qujattardyń Úkimet paıdalanatyn túrli barlaý kózderinen túskeni anyq ekendigin asa aıtty.
