Pentagonnyń ataýyn ózgertý 2 mlrd dollar shyǵynǵa túsýi múmkin

ASTANA. KAZINFORM — AQSh Qorǵanys mınıstrligin «Soǵys mınıstrligi» dep qaıta ataý shamamen 2 mıllıard dollar turýy múmkin. Bul — myńdaǵan mańdaısha jazýlardy aýystyrýdy, tsıfrlyq kodtardy qaıta jazýdy, jańa blankiler, plakattar men belgiler jasaýdy qajet etedi, dep habarlaıdy Kazinform menshikti tilshisi.

NBC News deregine sáıkes, Kongrestiń tórt joǵary laýazymdy qyzmetkeriniń aıtýynsha, tek jańa resmı blankiler men mańdaıshalardy aýystyrýdyń ózi 1 mıllıard dollarǵa jýyq shyǵyn keltiredi.

Ataýdy ózgertý kezindegi eń qymbat kezeńderdiń biri — vedomstvonyń barlyq ishki jáne syrtqy veb-saıttaryndaǵy, sondaı-aq qupııa jáne ashyq júıelerdegi baǵdarlamalyq qamtamasyz etýdegi tsıfrlyq kodtardy qaıta jazý bolady.

Pentagonnyń resmı ókili Shon Parnell sońǵy naqty shyǵyn mólsheri áli belgilenbegenin aıtty.

Qazir «Soǵys mınıstrligi» ataýy Qorǵanys mınıstrliginiń beıresmı balamasy retinde qoldanylady. Al resmı ataýdy ózgertý úshin Kongrestiń maquldaýy qajet. Senat pen Ókilder palatasyndaǵy kongressmender qyrkúıek aıynda osy másele boıynsha zań jobasyn usynǵan.

Alaıda Kentýkkı shtatynan saılanǵan respýblıkalyq senator Rend Pol bul bastamany ashyq synǵa alyp, ony «soǵysty dáripteý qaýpi bar» dep atap, zań jobasyn qabyldatpaý jáne oǵan qarjy bólýdi toqtatý úshin oppozıtsııany ózi basqaratynyn málimdedi.

Buǵan deıin AQSh prezıdenti Donald Tramp Pentagonǵa dereý ıadrolyq qarýdy synaqtan ótkizýdi bastaýdy tapsyrǵanyn jazǵan edik.