Pentagon basshysy Pıt Hegsettiń ushaǵy Ulybrıtanııada shuǵyl qondy

ASTANA. KAZINFORM — Pentagon basshysy Pıt Hegsettiń ushaǵy áınegindegi syzatqa baılanysty Ulybrıtanııada shuǵyl qondy. Bul týraly AQSh Qorǵanys mınıstriniń baspasóz hatshysy Shon Parnell habarlady.

TASS agenttigi atap ótkendeı, bul týraly Parnell X áleýmettik jelisinde jazdy.

— NATO elderiniń qorǵanys mınıstrleriniń kezdesýinen qaıtyp kele jatqanda, Hegsettiń ushaǵy áınegindegi syzatqa baılanysty Ulybrıtanııada qondy. Bul sapar josparlanbaǵan edi, — dep túsindirdi AQSh Qorǵanys mınıstriniń baspasóz hatshysy.

Ol ushaqtyń qonýy standartty protsedýraǵa sáıkes jasalǵanyn jáne barlyq jolaýshynyń qaýipsiz ekendigin naqtylady. Shuǵyl qoný barysynda eshkim zardap shekpegen.

Budan buryn Pentagon «jedel soqqy» qarýyn jasaýǵa 1 mlrd dollardan astam qarajat jumsamaqshy ekenin jazdyq.

Sonymen qosa Qatar Pentagonǵa Tramp úshin eshqandaı shartsyz ushaq syılady.