Pedagogtiń kestesin jasaýǵa bir ádistemelik kún berilýi kerek - qostanaılyq muǵalim
Elmıra Shaýenova - S.Máýlenov atyndaǵy gımnazııanyń qazaq tili men ádebıeti páni muǵalimi. 23 jyl úzdiksiz mektepte jumys atqaryp keledi. Joǵary sanatty muǵalimniń oblystyń «Úzdik pedagogi» degen ataǵy jáne bar. Onyń aıtýynsha, muǵalim mártebesi týraly zań der kezinde qabyldandy.
«Bizdiń jas kezimizde qoǵamdaǵy eń syıly adam - muǵalim dep túsingendikten, bar yntamyzben osy joldy tańdadyq. Ókinishke oraı, biz eńbek jolyn bastaǵan kezde muǵalim mártebesiniń qadiri kete bastady. Muny moıyndaý qajet. Degenmen de, qyzyǵy men qıyndyǵy qatar júretin jumysty aǵartý joly dep, urpaǵymyzdyń ulyqty bolýy úshin atqaryp kelemiz. Búginde muǵalim mamandyǵyn joǵary bilimi bar kez kelgen túlek tańdaıtyn boldy. Sondyqtan da pedagog mártebesi týraly zań memleketimizdiń der kezinde jasap otyrǵan qoldaýy dep túsinemin. Bul zańda muǵalimniń aptalyq júktemesin 16 saǵatqa azaıtý, negizsiz qaǵazbastylyqtan aryltý, jergilikti ákimdik tarapynan erkinen tys tapsyrmalardy oryndaýdan bosatý sekildi jaǵymdy jańalyqtar kóńil toltyrady», - dep oı bólisti tájrıbeli ustaz.
Atalmysh zańda zeınetkerlik jasty eńbek ótiline saı bekitý, ıaǵnı, oqý ornynda oqyǵan jyldaryn qosa eseptegende 30 jyldyq ótilmen zeınetke shyǵý múmkindigin usyný da durys oılastyrylǵan.
«Munyń tıimdi tusy kóp. Negizi jasy 50-den asqan muǵalimderdiń deni qazirgi jańartylyǵan bilim berý mazmunyna saı bilim berý jaǵdaıynda tolyqqandy jumysty joǵary ynta-jigermen atqara almaıdy. Densaýlyǵy syr berýi múmkin, ekologııalyq máselelerge baılanysty umytshaqtyq qasıet paıda bolýy múmkin. Al yntasy joq adamnan sapaly bilim berýdi uıymdastyrý shyǵýy ekitalaı. Bul da bizdiń bolashaǵymyzdy tárbıeleýge nuqsan keltirýi múmkin. Bul zańda osy jaǵy utymdy qarastyrylǵan», - dep túsindirdi Elmıra Shaýenova.
«Pedagog mártebesi» zańynyń jobasy talqyǵa túskeli S.Máýlenov atyndaǵy gımnazııasynda kásibı áńgimeler, dóńgelek ústelder uıymdastyrylyp keledi. Eńbek ótili joǵary pedagogter jergilikti telearnalarda suhbat berip, kezdesýlerde jas mamandardyń pikirleri tyńdaldy.
«Qazirgi zamanaýı bilim berý jaǵdaıynda tek sabaq berýmen shektelip otyra almaısyń. Túrli deńgeıdegi baıqaýlar kúndelikti kelip jatady. Daryndy oqýshylardy pán olımpıadalaryna daıyndaý, ǵylymı zertteý jumystaryna daıyndaý, sonymen birge ózińniń de kásibı deńgeıińdi kóterý úshin shyǵarmashylyǵyńmen bólisý, oqý-ádistemelik quraldaryn jazý, kásibı baıqaýlarǵa qatysý sııaqty tolyp jatqan jumystar bar. Sol sebepti ár muǵalimde osy istermen aınalysýǵa sabaq kestesin jasaǵanda 1 ádistemelik kún berilýin usynar edim», - dep usynysyn aıtty qostanaılyq muǵalim.
