Pedagogterdi áleýmettik jaǵynan qoldaýdyń kandaı tetikteri bar
ASTANA. KAZINFORM – Pedagogterdi áleýmettik jaǵynan qoldaýdyń kandaı is-sharalary eskerilgen? Muǵalimderge kandaı jeńildikter qarastyrylǵan? Bul suraqtarǵa Oqý-aǵartý mınıstrligi jaýap berdi.
- Salalyq zańnyń 12-babyna sáıkes, pedagogterge beriletin áleýmettik kómekter belgilengen. Atap aıtqanda, turǵynjaıǵa, onyń ishinde qyzmettik turǵynjaıǵa jáne jataqhanaǵa, jeke turǵyn úı qurylysy úshin jer ýchaskelerine kepildik beriledi. Aýyldy eldi mekenderde kásiptik qyzmetin júzege asyratyn pedagogterge jeke turǵyn úı qurylysy úshin jer ýchaskelerin berý zańnamada kózdelgen basymdyq tártippen júzege asyrylady, - delingen mınıstrliktiń Kazinform agenttigine bergen jaýabynda.
Aýyldaǵy muǵalimge: jergilikti ókildi organdardyń sheshimi boıynsha qala jaǵdaıynda kásiptik qyzmetin júzege asyratyn pedagogterdiń stavkalarymen salystyrǵanda aılyqaqylar men tarıftik stavkalar keminde jıyrma bes paıyzǵa arttyrylyp belgilenedi. Jergilikti ókildi organdar bekitken tártippen jáne mólsherde bıýdjet qarajaty esebinen kommýnaldyq kórsetiletin qyzmetterge aqy tóleý jáne otyn satyp alý boıynsha áleýmettik qoldaý kórsetiledi.
Sonymen qatar aýylda turý úshin kelgen pedagogke jergilikti ókildi organdardyń sheshimi boıynsha kóterme járdemaqy jáne turǵyn úı satyp alý nemese salý úshin áleýmettik qoldaý qarastyrylǵan. Jergilikti atqarýshy organdar pedagogke turǵynjaıdy jalǵa alý úshin jáne kommýnaldyq kórsetiletin qyzmetterge ótemaqy tólemderin, sanatorıı-kýrorttyq emdelýge ári demalýǵa joldama satyp alý úshin tolyq nemese ishinara tólemder, sondaı-aq pedagogti áleýmettik qoldaýǵa baǵyttalǵan ózge de jeńildikter belgileýge quqyly.
- «Pedagogterdi attestattaýdan ótkizý qaǵıdalary men sharttaryn bekitý týraly» Bilim jáne ǵylym mınıstriniń 2016 jylǵy 27 qańtardaǵy buıryǵyna sáıkes, jasy boıynsha zeınetkerlikke tórt jyldan az qalǵan pedagogter attestattaý rásiminen bosatylady. Pedagogterdiń qoldanystaǵy biliktilik sanaty ótinishi negizinde zeınetkerlik jasqa tolǵanǵa deıin saqtalady. Sonymen qatar Qaǵıdanyń 57-tarmaǵyna sáıkes, 30 jáne odan da kóp jyl pedagogıkalyq ótili bar barlyq laýazymdardyń pedagogteri qoldanystaǵy júıe boıynsha buryn berilgen biliktilik sanatyn rastaǵan jaǵdaıda PBB tapsyrýdan bosatylady, - dep atalyp ótken vedomstvo aqparatynda.
Qazaqstandyq oqý-aǵartý, ǵylym jáne joǵary bilim qyzmetkerleriniń salalyq kásipodaǵynyń málimentine sáıkes, 3 jyldyń ishinde bilim berý qyzmetkerleriniń otbasynan 14 748 bala (2023 jyly - 5 846 bala, 2024 jyly - 5 031 bala, 2025 jyly - 3 871 bala) kásipodaq jeńildigimen elimizdiń shıpajaılary men demalys oryndarynda saýyqtyrýdan ótti.
Munymen qosa, salalyq kásipodaqtyń aqparatyna qaraǵanda, 3 jyldyń ishinde (2023, 2024, 2025 j.j.) 81 211 bilim berý qyzmetkeri kásipodaq jeńildigimen elimizdiń shıpajaılary men demalys oryndarynda saýyqtyrýǵa bardy.
Aıta keteıik, buǵan deıin Oqý-aǵartý mınıstrligi pedagogterdi turǵyn úımen qamtamasyz etýge qatysty túsinik berdi.
Jaqynda Májilisiniń qaraýyna «Qazaqstan Respýblıkasynyń keıbir zańnamalyq aktilerine pedagog mártebesi jáne bilim berý máseleleri boıynsha ózgerister men tolyqtyrýlar engizý týraly» zań jobasy engizildi.
Oǵan sáıkes pedagogterdiń balalardyń ómiri men densaýlyǵy úshin jaýapkershiligin tek oqý protsesi barysynda aıqyndaý eskerilgen, ıaǵnı oqýdan tys ýaqytta jáne kanıkýl nemese keshki ýaqytta ata-anasynyń jaýapkershiligi bolýy tıis.