Pedagogter jasandy ıntellektini qoldanýda neni eskerýi tıis
ASTANA.KAZINFORM - Qazaqstanda JI tehnologııalaryn mektep tájirıbesine engizýdiń ádistemelik negizderi bekitildi. Tıisti talaptar men shekteýler Y.Altynsarın atyndaǵy Ulttyq bilim akademııasy ázirlegen qujatta naqtylandy. Bul týraly Oqý-aǵartý mınıstrligi habarlady.
Ádistemeni ázirleýdegi basty ustanym jasandy ıntellekt muǵalimdi almastyrmaıdy degen qaǵıda. Jasandy ıntellekt tek sabaq daıyndaýǵa, materıaldy beıimdeýge, taldaý jasaýǵa kómektesetin qural retinde qarastyrylady. Oqýshyny baǵalaý, oqý mazmunyn tańdaý jáne sońǵy sheshim qabyldaý quqyǵy tolyqtaı muǵalimniń quzyrynda qalady. Bilim nátıjelerin tolyq avtomattandyrýǵa jol berilmeıdi. Sondyqtan jasandy ıntellekt daıyndaǵan kez kelgen materıal muǵalimniń tekserýinen ótýi tıis.
Qujat tsıfrlyq qaýipsizdikke erekshe mán beredi. Onyń ishinde oqýshylardyń jeke derekterin bógde servısterge engizýge bolmaıdy, sabaqta qoldanylatyn platformalar zańnamalyq talapqa saı bolýy kerek. Sonymen qatar, akademııalyq adaldyqty saqtaýǵa erekshe mán beriledi. Oqýshylar JI arqyly daıyndalǵan jumystaryn óz eńbegi retinde usyna almaıdy, muǵalimder qajet bolǵan jaǵdaıda tapsyrmany qaıta bere alady.
Ádistemelik usynymda pedagogterge Canva, ChatGPT, Gemini Storybook, Notebook LM, Reading Coach, Google Lens jáne ózge de servısterdi sabaqta qoldanýdyń daıyn algorıtmderi men stsenarııleri berilgen. Bul muǵalimniń ákimshilik júktemesin azaıtyp, oqý materıaldaryn oqýshynyń jeke erekshelikterine beıimdeýge múmkindik beredi.
Ádistemelik usynym Y.Altynsarın atyndaǵy Ulttyq bilim akademııasynyń resmı saıtynda qoljetimdi. Ony pedagogter, ádiskerler, bilim berý uıymdarynyń basshylary, oqýshylar paıdalana alady. Bul qadam mektepterdiń tsıfrlyq transformatsııasyn júıeli túrde qoldaýǵa baǵyttalǵan.
Aıta keteıik, elimizdiń barlyq mektebinde erekshe pedagogıkalyq nazardy qajet etetin kámeletke tolmaǵandarǵa jeke pedagogıkalyq súıemeldeý engiziledi. Bul táýekel tobyndaǵy oqýshylardy erte anyqtaýǵa jáne olarǵa bilim berý uıymdarynda maqsatty psıhologııalyq-pedagogıkalyq kómek kórsetýge baǵyttalǵan.