Pedagogtarǵa 1,4 mlrd teńgeniń qarajaty qaıtaryldy - Kásipodaq

NUR-SULTAN. QazAqparat – Byltyr bilim salasyndaǵy kásipodaq múshelerinen zańsyz ustalǵan jáne tólenbegen 1,4 mlrd teńge qaıtaryldy. Qazaqstandyq salalyq bilim jáne ǵylym qyzmetkerleriniń baspasóz qyzmeti osyndaı málimet taratty, dep habarlaıdy QazAqparat tilshisi.

Qazaqstannyń bilim salasynda 500 myńnan astam kásipodaq múshesi jumys isteıdi. Atalmysh salalyq kásipodaq ókilderi ótken jyldyń qorytyndysyn shyǵarǵan eken.

«Ótken 2021 jyly eńbek zańnamasynyń oryndalýyn qoǵamdyq baqylaý sheńberinde bilim kásipodaǵy 1 730 tekserý júrgizdi. Onyń ishinde 2 797 eńbek zańnamasynyń buzylýy anyqtaldy. Onyń eńbekaqy tóleý boıynsha – 783, eńbek qatynastaryn resimdeý boıynsha – 798 jáne jumys ýaqyty men demalys ýaqyty rejımi boıynsha – 363 zańsyzdyq tirkeldi. Múshelik uıymdar men salalyq keńestiń quqyqtyq qyzmetiniń kómegimen zańsyz jumystan shyǵarylǵan 17 qyzmetker jumysqa qaıta alyndy», - delingen habarlamada.

Sondaı-aq, kásipodaq organdarynyń talaby boıynsha kásipodaq múshelerine 1,4 mlrd teńge mólsherinde zańsyz ustalǵan nemese tólenbegen aqsha qaıtarylǵan.

«Quqyqtyq máseleler boıynsha 21141 keńes berildi. 2022 jylǵy 1 qańtardaǵy jaǵdaı boıynsha sala uıymdarynda eńbek qaýipsizdigi jáne eńbekti qorǵaý jónindegi 8 363 óndiristik keńes jumys isteıdi. Tehnıkalyq ınspektorlar eńbek jaǵdaılary boıynsha 3825 tekserý júrgizdi. Júrgizilgen jumystardyń nátıjesinde salada jaraqattaný kórsetkishi 10-nan 8-ge deıin tómendedi», - dep jazady kásipodaq ókilderi.