Pedagogıkalyq eńbek ótili 124 jyl bolǵan ustazdar dınastııasy
ASTANA. KAZINFORM - Elimizde sanaly ǵumyryn bilim salasyna arnaǵan muǵalimder jeterlik. Bul mártebeli mamandyqty urpaqqa mıras etip qaldyryp kele jatqan ustazdar dınastııasy elordada da az emes. Solardyń biri – Sársembekovter áýleti. Elorda ákimdiginiń resmı saıty búginde pedagogıkalyq eńbek ótili – 124 jyl bolǵan, bir otbasynyń birneshe býyny muǵalimdik mamandyqty tańdaǵan ustazdar dınastııasy týraly jazdy.
Sársembekovter áýletinde 6 birdeı muǵalim bar. Áýlettiń aqsaqaly, jetpisten asqan Muratqalı Sársembekov 35 jyldyq eńbegin ustazdyqqa arnaǵan.
«Men Abaı oblysy Jarma aýdanynyń Sýyqbulaq orta mektebin bitirdim. Áskerge baryp kelgen soń ustazdyq joldy tańdadym. Semeı oblysynyń Pedagogıkalyq ınstıtýyn támamdap, hımııa jáne bıologııa páni muǵalimi retinde Sýyqbulaq orta mektebinde qyzmet ettim. Ustaz shákirtimen máńgi máýeli. Oqýshynyń jetistigin kórý – muǵalim úshin baqyt. Túlep ushqan oqýshylarym búginde beldi mamandar, elimizdiń túkpir-túkpirinde ártúrli salada abyroıly eńbek etip jatyr. Otbasymdaǵy balalarym da bul salany tańdaǵanyna qýanamyn. Sebebi ustazdyq jolda atqarǵan adal eńbek eshqashan baǵasyz qalmaıdy», - dedi ardager ustaz.
Muratqalı Sársembekovtiń zaıyby Zııash Sársembekova da uzaq jyldar boıy muǵalim bolyp qyzmet etken. 36 jyl fızıka jáne matematıka páni muǵalimi ustazdyqty arman-tilekten buryn, qanmen, tekpen daryǵan mamandyq, atakásip dep esepteıdi. Ardager ustazdardyń tuńǵysh uly Erlan Sársembekov – Astana qalasynyń Mirjaqyp Dýlatuly atyndaǵy №68 mektep-gımnazııasynyń dene shynyqtyrý páni muǵalimi.
«Abyroıly mamandyqty tańdaǵanyma esh ókinbeımin. Jarymdy da osy saladan taptym. 16 jyldan asqan eńbek jolymda salanyń qyzyǵy men qıyndyǵy qatar júretinin jete uǵyndym. Pedagog retinde aıqyndap alǵan maqsatym – ár oqýshynyń boıynan erekshe qabiletterdi taýyp, olardy jańa belesterge jetkizý», - dep bólisti muǵalim.
Bul áýlettiń bir ereksheligi – otbasyna túsken úsh kelinniń úsheýi de muǵalimder. Olardyń qataryndaǵy Laýra Sársembekova – elordalyq Mirjaqyp Dýlatuly atyndaǵy №68 mektep-gımnazııasynyń dırektory. 20 jyl ishinde ol Astananyń birqatar mektepterinde ár jyldary dırektordyń oqý, beıimdik jumysy orynbasary qyzmetin atqardy.
«Áý basta muǵalim bolamyn dep oılamadym. Oǵan sebepshi bolǵan ájem men ákem edi. Sol kisilerdiń yqpalymen joǵary oqý ornyna túsip, bul salany janyma jaqyn tarttym. Qyzmetimdi Semeı óńirinde qazaq tili men ádebıeti pániniń ustazy retinde bastadym. Keıin salada ósýime qanat bitirgen, árkez qamshylap otyrǵan meniń ata-enem edi. Kelin bolyp túskende, olar túsinistikpen qarap, dastarhan basynda otyrǵannyń ózinde «baryp sabaǵyńa daıyndala ber» dep únemi qolǵabys bildirip otyrady. Arada jyldar ótip, otbasymyzben Astanaǵa kóship keldik. Birneshe bilim berý mekemelerinde tájirıbemdi jınaqtap, sońǵy eki jylda mektep dırektory retinde jumys isteýdemin. Qazirgi tańda Mirjaqyp Dýlatuly atyndaǵy №68 mektep-gımnazııasynda 108 muǵalim oqytsa, 1370 oqýshy bilim alady», – dedi Laýra Sársembekova.
Mektep dırektorynyń aıtýynsha, ustazdyń basty mıssııasy – balaǵa ómir súrý daǵdylaryn úıretip, qoǵamǵa ońaı beıimdep, óz ornyn taba bilýge kómektesý.
«Balalaryma tárbıe bergende únemi adamdarmen jaqsy qarym-qatynas ornatý, kórkem minezdi bolýdyń mán-maǵynasyn uǵyndyrýǵa tyrysamyn. Sebebi muǵalim úshin tıimdi ári durys kommýnıkatsııanyń orny aıryqsha. Muǵalim bilgenimen ǵana shektelmeı, bilimin odan ári jetildirýi qajet. Qazirde oqýshylarǵa ulttyq qundylyqtarǵa negizdelgen bilim berýdi, óz oıyn anyq ári naqty jetkizetin tulǵa retinde qalyptastyrýǵa basymdyq beriledi. Oqý protsesindegi «Birtutas tárbıe» baǵdarlamasy oqýshylardyń jalpy adamı qasıetterin arttyrýǵa septesip, búginde nátıjesin kórsetip keledi», - dedi ol.
Erlan men Laýra Sársembekovter – kópbalaly ata-ana. Úıdiń tuńǵyshy Mádına Muratqalı – Astana Halyqaralyq ýnıversıtetinde bıologııa páni muǵalimi mamandyǵynyń 2 kýrs stýdenti.
«Mamandyqty tańdaýyma otbasym sebepshi boldy. Balaǵa bilim bere otyryp, meıirimmen sýsyndatqany áser etip, ózim de osy salany janyma jaqyn kórdim. Men ata-anamnan balamen durys jumys isteýdiń, olardyń tilin tabýdyń ári sapaly bilim berýdiń árkez jańa ádis-tásilderin meńgerip otyramyn. Muǵalim – balanyń mekteptegi bilim beretin ǵana emes, tárbıege úıretetin ekinshi anasy. Otbasymyzda ata-anamyz bizdi yntalandyrý maqsatynda jaqsy jetistigimiz ne úlgerimimiz úshin shabyttandyryp otyrady. Qazirgi býyn sapaly ári jańashyl oqytý júıesin kútedi. Sabaq barysynda meılinshe kórnekiliktiń jarqyn túrlerin kórsetý, qıyn bolyp kóringen taqyryptyń ózin oıyn túrinde úıretý oqýshylar úshin mańyzdy», - dep oı bólisti bolashaq muǵalim.
Buǵan deıin Pavlodardaǵy daryndy balalarǵa arnalǵan Abaı atyndaǵy gımnazııa muǵalimi Nazerke Semeı býllıngtiń aldyn alý baǵytynda ózindik tehnologııasymen tanylǵanyn jazǵan bolatynbyz.
