PІB Medıtsınalyq ortalyǵy halyqaralyq sertıfıkatqa ıe boldy
ASTANA. KAZINFORM — Maýsymda Medıtsınalyq ortalyqta menedjment sapasy júıesiniń ISO 9001:2015 halyqaralyq standartyna sáıkestigi boıynsha eki kezeńnen turatyn aýdıt sátti aıaqtaldy, dep habarlaıdy QR PІB Medıtsınalyq ortalyǵynyń baspasóz qyzmeti.
Aýdıtti álemdegi jetekshi sertıfıkattaý kompanııalarynyń biri Bureau Veritas Certification Holding júrgizdi.
ISO 9001:2015 sertıfıkaty Medortalyqtyń sapa menedjmenti júıesi halyqaralyq talaptarǵa saı ekenin jáne tıimdi jumys isteıtinin, sondaı-aq medıtsınalyq qyzmet kórsetý men úderisterdi uıymdastyrýdyń joǵary deńgeıin qamtamasyz etetinin rastaıdy.
— Medıtsınalyq ortalyq ózi basqarýshy uıym jáne sheshim qabyldaý ortalyǵy retinde alǵash ret sapa menedjmenti júıesiniń jumysyn halyqaralyq deńgeıde tekserýden ótkizip otyr. Buǵan deıin halyqaralyq sertıfıkattaýdan Medortalyqtyń baǵynysty mekemeleri ótetin. Aǵymdaǵy jyldyń mamyr jáne maýsym aılarynda eki kezeńmen ótken táýelsiz aýdıt jumysymyzdyń joǵary deńgeıde uıymdastyrylǵanyn rastady, — dep atap ótti QR PІB Medıtsınalyq ortalyǵynyń basshysy Alekseı Tsoı.
ISO 9001:2015 halyqaralyq sertıfıkatyn alý — ishki úderisterdi odan ári jetildirýge jáne Medıtsınalyq ortalyqtyń joǵary sapa standarttaryna adaldyǵyn rastaýǵa baǵyttalǵan taǵy bir mańyzdy qadam sanalady. Bul qujat úsh jyl merzimge beriledi jáne jyl saıyn belgilengen talaptarǵa sáıkestigin mindetti túrde rastaýdy kózdeıdi.
Buǵan deıin Prezıdenttiń is basqarmasy Medıtsınalyq ortalyǵynyń aýrýhanasy ulttyq akkredıtteýdiń joǵary sanatyna ıe bolǵanyn jazǵanbyz.