Pavlodarlyq stýdentter 30 qarııaǵa azyq-túlik taratty

PAVLODAR. QazAqparat - Mereke kúnderi ýnıversıtet jataqhanasynda qalǵan Pavlodar pedagogıkalyq ýnıversıtetiniń stýdentteri qaıyrymdylyq aktsııasyna bastamashy boldy, dep habarlaıdy QazAqparat.

El Táýelsizdiginiń 30 jyldyǵyna oraı stýdentter 30 qarııaǵa áleýmettik mańyzy bar azyq-túlik salynǵan jáshikter taratty.

Eriktiler arnaıy uıymdastyrylǵan qaıyrymdylyq jármeńkeden jınalǵan qarajatqa azyq-túlik satyp aldy.

Satylymǵa qoıylǵan qolóner buıymdarynan stýdentter 200 000 teńgege jýyq tabys tapty.

Sodan eki kúnniń ishinde qarttarǵa azyq-túlik paketterin jetkizip berdi.

Ata-ájeler oqý ornynyń belsendi jastaryna alǵysyn aıtyp, bolashaq ustazdardyń ıgi isterine sáttilik tiledi.

Esterińizge sala keteıik, «LOTOS» eriktiler uıymy Pavlodar pedagogıkalyq ýnıversıtetinde ıgi isterdi júzege asyrý úshin qurylǵan.