Pavlodarlyq mýzykanttar Konstıtýtsııa kúnine oraı tramvaıda kontsert berdi
Aldaǵy mereke – Qazaqstan Respýblıkasynyń Konstıtýtsııasy kúnine oraı mýzykanttar №5 aınalma baǵyt boıynsha tramvaı jolaýshylaryna jandy daýysta óner kórsetti. Qoǵamdyq kólikte monokontsert ótkizý arqyly pavlodarlyqtardy tań qaldyrý ıdeıasy mýzykanttarda ótken jyly paıda bolǵan. Óz josparlaryn júzege asyrý úshin kameralyq hordyń ártisteri tramvaı basqarmasyna júgingen. Basqarmada olardyń usynysy birden qoldaý tapty.
«Bundaı mýzykalyq sharany biz qoǵamdyq kólikte birinshi ret ótkizip otyrmyz, Dál osyndaı túrde biz bıyl qalamyzdyń barlyq turǵyndaryn kele jatqan mereke - Qazaqstan Respýblıkasynyń Konstıtýtsııasy kúnimen quttyqtaýdy jón kórdik. Árıne, óz tyńdarmandarymyzǵa jaqyndaǵymyz, sonymen qatar, hor ujymynyń múmkindikterin kórsetkimiz keledi»,- deıdi I.Baızaqov atyndaǵy Pavlodar oblystyq fılarmonııasynyń kameralyq horynyń jetekshisi Madına Nurǵojınova.
Tramvaı salonyna kirgen pavlodarlyqtar ózderiniń tańdanysyn jasyrmady. Biraz ýaqyttan keıin olar ártistermen birge bılep, qol shapalaqtap qoshemet kórsetti. Óz ónerlerinde eshqandaı mýzykalyq aspap qoldanbaıtyn kameralyq hor qatysýshylarynyń jandy daýysymen qala turǵyndary qazaqstandyq jáne sheteldik tanymal hıtterdi estidi.
Tramvaı basqarmasynyń qyzmetkerleri aktsııanyń ótýine alańdaýshylyq bildirgen bolatyn. Bul tramvaıda mundaı is-sharalarǵa kóp oryn bolmaýynan jáne №5 baǵdardaǵy jolaýshylar tasymaly aıtarlyqtaı úlken bolǵandyqtan týyndaǵan.
«Biz árqashan jolaýshylarǵa tramvaılarda júrý yńǵaıly bolýyn qalaımyz. Árqashan qala turǵyndarynyń kóńil-kúıin kóterýge tyrysamyz. Sondyqtan óz bastamamyzben túrli aktsııalar ótkizemiz. Mysaly, shilde-tamyzda kóshede aptap ystyq bolǵan kezde, almatylyq kompanııanyń demeýshiligimen biz «Ystyq» aktsııasyn bastadyq jáne tramvaılarda 800-900 bótelke salqyn sýsyndy tegin tarattyq. Árıne, buǵan adamdar óte rıza boldy. Endi bizde taǵy bir aktsııa – «Sálem, mektep!» bastaldy. Biz jas jolaýshylarymyzdy jáne olardyń ata-analaryn kele jatqan oqý jylymen quttyqtap, kishkentaı syılyq retinde olarǵa oqýǵa qajetti zattar beremiz», - deıdi Pavlodar tramvaı basqarmasynyń marketıng jáne jarnama bóliminiń basshysy Natalıa Temırǵalına.
Bir qyzyǵy, pavlodarlyqtar kameralyq hordyń ártisterin jibergisi kelmedi. Tipti olardan ónerlerin qaıtalap kórsetýin ótindi. Mýzykanttardyń aıtýynsha, olardyń qaı jerde óner kórsetetini mańyzdy emes. Eń bastysy, óz ónerimen jerlesterine kóterińki kóńil-kúı syılaýdy maqsat tutady.