Pavlodarlyq zeınetker sot sheshimimen jerin qaıtaryp aldy
PAVLODAR. KAZINFORM — Kórshiles turǵyn ortaq paıdalanymdaǵy jerdiń biraz aýmaǵyn jerge ornalastyrý jobasyna engizip alǵan.
Sot qatelikke jol bergen qalalyq jer qatynastary bólimine jáne Halyqqa qyzmet kórsetý ortalyǵyna arnaıy uıǵarym shyǵarýǵa májbúr bolǵan.
Zeınetker E. — Pavlodar qalasy Isa Baızaqov kóshesinde ornalasqan jalpy paıdalanýdaǵy 600 sharshy metr jer ýchaskesi bar úıdiń ıesi. Oǵan 2006 jyly ákimdiktiń qaýlysymen jeke turǵyn úı qurylysyn salý jáne kútip ustaý úshin 0,0369 ga jer ýchaskesi berilip, kadastrlyq nómir belgilengen. Sondaı-aq jer ýchaskesine jeke ortaq úlestik menshik quqyǵyna akti berilgen.
Al 1990 jyly múddeli tulǵa N. zeınetkermen kórshi bolyp ornalasady. Ol úı ornalasqan jerdi syıǵa alǵan. Odan ári er adam «Azamattarǵa arnalǵan úkimet» memlekettik korporatsııasy KEAQ-men jalpy aýdany 0,0864 jer ýchaskesine (oǵan E.-niń jer ýchaskesi enip ketken) jerge ornalastyrý jobasyn ázirlegen. Pavlodar qalasynyń jer qatynastary bólimi 0,0720 ga (qujattar boıynsha 0,0864 ga) jer ýchaskesine jerge ornalastyrý jobasyn bekitip jiberedi. Osylaısha E.-ge tıesili jer ýchaskesiniń kadastrlyq nómiri joıylyp, kórshisi álgi jerdiń ıesi bolyp shyǵa kelgen.
— Zeınetker E., bólimniń buıryǵyn jaramsyz dep taný jáne «Azamattarǵa arnalǵan úkimet» korporatsııasyndaǵy tirkeýdiń kúshin joıý týraly talap qoıýmen sotqa júgindi. Óıtkeni bul jer ýchaskesi ortaq úlestik menshik nysany bolyp tabylady. Birinshi satydaǵy sottyń sheshimimen ákimshilik talap qoıý qanaǵattandyryldy, — dep habarlady oblystyq sottyń baspasóz qyzmetinen.
Belgili bolǵandaı, múddeli N. sot sheshimimen kelispeı, talap qoıýdy qanaǵattandyrýdan bas tartý týraly apellıatsııalyq shaǵym túsirgen. Biraq sot barlyq jaǵdaıdy elep-eksheı kele, alǵashqy sheshimdi zańdy dep tanydy jáne ózgerissiz qaldyrdy.
Sondaı-aq, Pavlodar oblystyq sotynyń ákimshilik ister jónindegi sot alqasy «Azamattarǵa arnalǵan úkimet» korporatsııasy men qalalyq jer qatynastary bólimine tıisti sharalar qabyldaý, aldaǵy ýaqytta mundaı faktilerge jol bermeý týraly eki jeke uıǵarym shyǵardy.
Sot qaýlysy zańdy kúshine endi.
Eske sala keteıik, BQO-da jaıylymdyq jer sot sheshimimen aýyl turǵyndaryna qaıtaryldy.