Pavlodarlyq sýretshiler 10 jyl kútken sımpozıým qashan ótedi
PAVLODAR. KAZINFORM - Pavlodar oblysynda sońǵy 10 jylda sýretshilerdiń birde-bir sımpozıýmy ótpepti. Qylqalam sheberleriniń respýblıkalyq jáne halyqaralyq deńgeıge jetýi úshin mundaı is-sharalar qajet-aq. Alaıda óńirde sýret óneriniń súleılerin qoldaýdyń azdyǵy baıqalyp otyr.
Jergilikti qylqalam sheberleri sońǵy ýaqytta tájirıbe almasýdyń azaıyp bara jatqanyna shaǵymdandy. Shyǵarmashylyq is-sharalar óte sırek ótedi, jergilikti atqarýshy organdar tarapynan tapsyrys joqtyń qasy. Al Ertis-Baıan óńirinde dúnıege kelgen áıgili tulǵalardy kenepke túsirý, músinderin beıneleý máselesin memlekettik saıasat pen mádenıetimizge jaýap beretin mekemeler tipti umyt qaldyrǵandaı. Búginde sýretshiler odaǵynyń fılıalynda nebári 22 múshesi ǵana bar. Odaq músheleriniń jasy qartaıyp barady. Jas degenderiniń ózi 40-ty ortalap qalǵan. Osynyń barlyǵy jergilikti deńgeıde qoldaýdyń azdyǵynan, sýretshilerdiń materıaldyq-tehnıkalyq múmkindikteriniń tómendep ketýinen dep esepteıdi shyǵarmashylyq ıeleri.
- Jasyryp keregi ne, keıbir myqty sýretshilerimizdiń izdenýge murshasy joq. Qazir únemi sýret salýmen aınalysyp, ómir súrý múlde múmkin emes. Bizdiń qatarymyzdaǵy azamattardyń biri mektepte eńbek etse, endi biri kúzetshi bolyp jumys istep júr. Otbasylaryn asyraýy kerek qoı. Sońǵy 10 jylda oblysta sýretshilerdiń sımpozıýmy birde-bir ret ótip kórgen joq. 2003 jyly Baıanaýylǵa 20 sýretshi, Pavlodar qalasyna 20 músinshi jınalyp, keremet tájirıbe alańy bolǵan edi. Sol sımpozıým nátıjesinde oblys ortalyǵynda qanshama músinder paıda boldy. Odan soń 2013 jylǵy sımpozıýmdy surap júrip uıymdastyrdyq. Sodan beri sýretshilerdiń álgindeı respýblıkalyq, halyqaralyq jıyndaryn ótkizý biz úshin armanǵa aınalyp qaldy. Sýretshilerdiń biliktiligin arttyrý, ózara tájirıbe almasý degendi umyttyq. Jyl saıyn jergilikti mádenıet basqarmasyna, oblys basshylyǵyna ótinishpen shyǵamyz, alaıda taýymyz shaǵylyp qala beremiz. Anaý Almaty qalasynda, Atyraý, Túrkistan, Taldyqorǵan óńirlerinde jylyna 2 retten sımpozıým ótedi. Bizdiń basshylar aqsha joq dep qutylady. Qalanyń aınalasy tolǵan iri zaýyttar, demeýshi tabylmaıdy degenge kim senedi?..-dep qynjylady «Pavlodar oblystyq sýretshiler odaǵy» QB tóraǵasy, Qazaqstannyń eńbek sińirgen qaıratkeri, kórkemsýret akademııasynyń akademıgi Óserbaı Shuranov.
Bıyl Pavlodar oblysynda dúnıege kelgen tarıhı tulǵalar men áıgili jerlesterimizdiń mereıtoılyq jyldary. Buǵan qosa Pavlodar oblystyq kórkemsýret mýzeıiniń qurylǵanyna - 60, al zamanynda tanymal sýretshi bolǵan Naǵymbek Nurmuhammedovtiń týǵanyna 100 jyl. Byltyr Nurmuhammedovtiń esimi mýzeıge berildi. Endigi kezekte onyń mereıtoıyn áıgili jerlesterimizdiń qatarynda atap ótý kózdelgen.
Ókinishke qaraı, oblystyq mýzeıde Nurmuhammedovtiń ózi turmaq, ózge tarıhı tulǵalarǵa arnalǵan portretter joqtyń qasy. Qazaqstan ǵylymynyń negizin salǵan Q.Sátbaevtiń, arheologııa ǵylymynyń atasy Á.Marǵulannyń, ǵulama Máshhúr Júsiptiń, Alash qaıratkeri J.Aımaýytovtyń sýretteri joq. Sebebi tapsyrys joq.
«Bizdiń sýretshiler tarıhı adamdardyń portretterin salyp berýge árdaıym daıyn. Alaıda olardyń eńbegi úshin tólenýi kerek qoı. Qazir barlyǵy memlekettik satyp alýlarǵa kóship ketken. Biz sııaqty qarapaıym shyǵarmashylyq adamdary konkýrs degendi túsinbeımiz. Keıbir jaǵdaıda sýretter salý, bezendirý úshin memlekettik satyp alýlar oınatylyp jatyr degendi estımiz. Biraq ony syrttan ózge adamdar utyp alady. Sońǵy jyldary oblysta birneshe qazaq mektebi ashyldy. Biz mektepterge esimi berilgen tulǵalardyń sýretterin salaıyq, músinderin jasap bereıik dep usynys tastaǵanbyz. Alaıda bizdi taǵy eshkim estimedi. Mysal úshin bıyl halyq geology Qosym Pishenbaevtiń 180 jáne balalar aqyny, qalamger Múbárak Jamanbalınovtyń 100 jyldyǵyna oraı áriptesimiz Ryspek Stybaev qos tulǵanyń portretterin tamasha etip saldy. Olar kórmege de qoıyldy. Sýretshi qanshama eńbegin jumsaǵan bul eki keskindemeni áli kúnge eshkim satyp almaı otyr. Q.Pishenbaev Ekibastuz kómiri men Maıqaıyń altynyn alǵash bolyp ashqan áıgili kentanýshy emes pe? Jergilikti bılik pen kómir kenishteriniń qojaıyndary ol kartınany kórse de, baıqamaǵan bolyp otyr. Ónerge degen osyndaı selqostyq bizdiń shyǵarmashylyǵymyzǵa qaıaý túsiredi. Budan bólek, sýretshilerimiz úshin yńǵaıly ári keń sheberhana da joq. Salynyp jatqan kópqabatty úılerdiń shatyry astynan sheberhana jasaqtaýdy surap kelemiz. Ony bizdiń múshelerimiz jalǵa alýǵa daıyn», dep áńgimesin jalǵastyrdy Ó.Shuranov.
Odaqtyń fılıaly mádenıet basqarmasyna bıyl oblysta qaıtsek te sımpozıým ótkizeıik dep usynys jasaǵan eken. Biraq oǵan qatysty naqty sheshim qabyldanbapty. Sýretshilerdiń pikirinshe, jıyn kúzde uıymdastyrylýy kerek. Ári oǵan shaqyrylatyn sýretshilerdiń tizimi aldyn ala jasalyp, olar salatyn sýretter aldyn ala bólinip berilýi tıis. Sımpozıým qorytyndysy boıynsha katalog shyǵarý da jaýapkershilikti qajet etetin is. Sýretshilerimizdiń damýy úshin, respýblıkalyq jáne halyqaralyq deńgeılerge jetý úshin mundaı is-sharalar kóp bolýy kerek dep esepteıdi qylmaqalam sheberleri.
Naǵymbek Nurmuhammedov atyndaǵy oblystyq kórkemsýret mýzeıiniń basshysy Aqertis Soltanbaev jalpy shyǵarmashylyq turǵysynan sýretshilerdiń josparlary oryndalmaı otyrǵanyn jetkizdi. Buryndary osy ýaqytta birneshe plenerler ótetin. Qazirgi sýretshilerdiń kóbi salondyq kartınalar salýǵa qumar. Soǵan oraı odaqtyń qataryn tolyqtyrýǵa nıetti adamdar az ekenin atap ótti ol.
