Pavlodarlyq kásipker «Jumyskerin» sýbsıdııalanatyn tehnıkalar tizimine engizgisi keledi
PAVLODAR. KAZINFORM – «Jumysker» – Maı aýdanynda qurastyrylyp shyǵatyn shaǵyn traktor. Bul – kezindegi Pavlodar traktor zaýyty joıylǵaly óńirde alǵash bolyp tolyq qurastyrylǵan ári patentke ıe bolǵan jalǵyz tehnıka.
Búginde syrttan keletin aýylsharýashylyǵy kólikteriniń baǵasy aspandap tur. Ony ala berýge ekiniń biriniń shamasy jetpeıdi. Osyndaı ýaqytta baǵasy qoljetimdi ári senimdi otandyq tehnıkalarǵa basymdyq berilgeni abzal. Máselen, «Dımash» jeke kásiporny «Bıznestiń jol kartasy-2025» baǵdarlamasy arqyly utyp alǵan 5 mln teńge grantty paıdalanyp, 2022 jyly shaǵyn traktorlar óndirisin jolǵa qoıdy. Ámbebap tehnıka 15 túrli jumysty atqara alady. Onymen:
- shópti shaýyp, jınaý
- kartop otyrǵyzý
- qysta qar kúreý
sııaqty taǵysyn taǵy aýyldyń bitpeıtin sharýalaryn lezde dóńgeletip tastaýǵa bolady.
Tehnıkaǵa qajet tıeýish shómish, qar kúregishter, arnaıy ashalar qosymsha jasalady. Patenti bar. Baǵasy Qytaıda qurastyrylatyn shaǵyn traktorlardan eki esege jýyq arzan. Bireýi shamamen 2,5 mln teńge turady.
Kásiporyn basshysy Erlik Taıshybaev óndiristik bazada alǵashqy jyly 2 shaǵyn traktor qurastyrylyp shyqqanyn aıtady. Onyń ekeýi de satylyp ketipti. Odan soń taǵy 5 traktor shyǵarylǵan. «Jumyskerdiń» biri qazirgi kúni oblys ortalyǵyndaǵy «Jailau» fermerlik bazarynda júr. Tehnıka yńǵaıly ári utqyr deıdi ondaǵy qyzmetkerler. «Pavlodar» ÁKK» AQ ókili Arman Asıpov fermerlik bazar alǵash ashylǵan kúnnen bastap aýmaqtaǵy saýda pavılondaryn ornalastyrý, qar tazalaý jumystary shaǵyn traktordyń kómegimen júzege asyp jatqanyn aıtady.
«Qujatynda júk kótergishtigi 300 kg dep jazylǵan. Deıturǵanmen, tehnıka 360 keli júkti qınalmaı ala beredi. Shaǵyn shómishi men qyrǵyshy óte qolaıly. Qazir shtatqa traktorıst alǵanbyz. Qozǵaltqyshy kúni boıy jumys istegende nebári 5 lıtr benzındi jaǵatynyn aıtady. Bul jaǵynan alǵanda biz úshin tıimdi», — deıdi ol.
Pavlodarlyq traktordyń taǵy birin Aqmola oblysynan bir sharýa kelip satyp alǵan. Sandyqtaý aýdany Vladımırovka aýylynyń turǵyny Valerıı Vznıkın baǵasy arzan ári kópfýnktsııaly shaǵyn traktorǵa qol jetkizgenine qýanyshty. Aıtýynsha, bul tehnıkany ınternetten izdep, áreń taýypty. Qytaıda shyǵarylǵan balamalaryn alaıyn dese, baǵasy tym qymbat ári aqaý shyqsa qosymsha bólshekterin izdep tabý qıyn. Qozǵaltqyshy men konstrýktsııasy qarapaıym kólik qazirgi kúni qora-jaıdaǵy maldy jaıǵaýǵa, aýladaǵy qardy tazalaýda taptyrmas tehnıka bolyp tur. Qytaılyq traktorlardaǵy sekildi kúrdeli gıdromotor, túrli qymbat rezeńkeler men tehnıkalyq shlangiler munda joq, qarapaıym júıe ornatylǵan. Bólshekteri isten shyqsa, jańasy bazarda arzan turady.
Buryn «Belarýs» traktoryn tizgindegen V. Vznıkın aýyl sharýashylyǵy úshin óte tıimdi mundaı otandyq kólikterdi satýǵa memlekettiń ózi múddeli bolýy kerek dep esepteıdi. Úkimet shetelden keletin tehnıkany satyp alýǵa mıllıondap sýbsıdııa tólegenshe, osyndaı baǵasy arzan otandyq quraldarǵa basymdyq bergeni abzal ekenin aıtady.
Fermerler pavlodarlyq shaǵyn tıegish-traktordyń tıimdiligine kóz jetkizip otyr. Eger onyń qunynyń belgili bir bóligi memleket tarapynan sýbsıdııalanatyn bolsa, satyp alýǵa daıyn sharýashylyqtar az emes.
Osydan birer jyl buryn sheteldik áldebir kompanııamen kelisimshart negizinde oblys ortalyǵynda Qytaı eliniń mashınalary qurastyrylady dep kútilgen edi. «Pavlodar» arnaıy ekonomıkalyq aımaǵynda salynýǵa tıis óndiris jobasy sol kúıi qaǵaz betinde ǵana qaldy. Bul turǵydan alǵanda aýyl kásipkeriniń batyl bastamasy qoshemetteýge turarlyq.
Erlik Taıshybaev búginde ózi qurastyratyn tehnıkany satýǵa memleket tarapynan kómek bolsa degen nıetin jetkizdi. «Jumysker» quny sýbsıdııalanatyn aýylsharýashylyǵy tehnıkalarynyń tizbesine ense, sonyń ózi Maı aýdanyndaǵy traktor óndirisine úlken sep bolary sózsiz.
Pavlodar oblysynyń kásipkerlik jáne ındýstrııalyq-ınnovatsııalyq damý basqarmasy basshysynyń mindetin atqarýshy Rýslan Tileýlesov qazirgi ýaqytta óńirde aýylsharýashylyǵy tehnıkalaryn qurastyrýmen 4 kásiporyn aınalysyp otyrǵanyn jetkizdi. Biraq olar qosalqy bólshekterdi jáne agregat tetikterin ázirleýmen shuǵyldanady. Daıyn traktor qurastyryp shyǵatyn óndiris jalǵyz.
«Bul kásiporynnyń tehnıka qurastyrý salasynda 10 jyl tájirıbesi bar jáne táýekelder týyndaǵan jaǵdaıda óndiris shaǵyn bloktar óndirisine qaıta baǵdarlanýy múmkin. Buǵan deıin Maı aýdanyndaǵy eldi mekenderdi abattandyrý konkýrsyna óz tehnıkalarymen qatysýǵa nıet bildirgen. Biz óz tarapymyzdan kómek kórsete almaıtynymyzdy jetkizdik, sebebi naryqta erkin básekelestik bolýy kerek. Al ol qurastyryp jatqan tehnıkalardy satý, lızıngtik baǵdarlamalarǵa, ıaǵnı quny sýbsıdııalanatyn aýylsharýashylyǵy tehnıkalary tizimine engizý — bizdiń quzyrymyzǵa jatpaıtyn sharýa. Ol úshin kásipker óz ónimin memlekettik satyp alýlar portalynda tirkep, qujattar resimdeýi kerek. Al quny sýbsıdııalanatyn tehnıkalardyń tizbegin Aýyl sharýashylyǵy mınıstrligi men Ónerkásip jáne qurylys mınıstrligi usynady», — deıdi basqarma basshysy.
Óńirlik aýyl sharýashylyǵy basqarmasynyń jaýaby da osyǵan uqsas. Basshy orynbasary S. Shúkirova «bizdiń taraptan kásipker esh kómek kútpeı-aq qoısyn» degen syńaıda jaýap qaıtardy.
Mundaı traktordyń búginde Qazaqstan boıynsha birneshe úlgisi kezdesedi. Deıturǵanmen, shaǵyn traktordy qurastyrýshy óz óniminiń kóptegen artyqshylyqqa ıe ekenin alǵa tartady. Máselen, kótergishtiń jebesine bytyra moıyn tirek presteledi. Ádette qurastyrýshylar ol jerge qarapaıym bilik qoıa salatyny bar. Bilik biraz ýaqyttan soń jelinip, ony jańartýǵa týra keledi. Sonymen qosa, salmaǵy 700 keli bolatyn ámbebap kólik quraly saǵatyna 15 shaqyrymǵa deıin jol júrýge qaýqarly eken.
