Pavlodarǵa shybyn-shirkeıdi áýeden ýlaıtyn 10 ushaq jetkizildi
PAVLODAR. KAZINFORM – Olar Ertis ózeni jaıylmalaryna bıologııalyq preparat shashyp, qansorǵysh jándikterdi joıady. Dezınsektsııalyq is-sharalar ózender jaǵalaýlarynda ornalasqan 59 eldi mekende josparlanǵan.
Óńirde shybyn-shirkeıge qarsy kúres jumystary bastaldy. Bıyl áýeden, ózen arqyly jáne tosqaýylmen óńdeý sharalary kúsheıtildi.
Óńdeý aýmaǵynyń 45 myń gektarǵa ulǵaıýyna baılanysty qosymsha ushaqtar tartylǵan. Jumystyń aýqymdylyǵyna oraı áýeden dezınsektsııalyq jumystar júrgizetin 10 ushaq jetkizildi.
- Barlyq ushaq keldi, merdigerdiń qajetti lıtsenzııasy bar. Endigi kezekte shybyn-shirkeılerdiń jappaı ushyp shyǵatyn kúnin belgileý mańyzdy - bul sýdyń tolyq jaıylǵanynan keıin múmkin bolady. Ǵylymı top usynys bergennen keıin negizgi jumystar bastalady. Strategııa qurylyp, algorıtm bekitildi jáne árbir kezeń ǵylymı toptyń baqylaýymen ótedi, - dep habarlady óńirlik ákimniń baspasóz qyzmetinen.
Dezınsektsııalyq is-sharalar jaǵalaý boıynda ornalasqan oblystyń 59 eldi mekeninde josparlanǵan. Ózendi óńdeý jumystary 10 quıý núkteden úsh kezeńde júzege asyrylady. Ertis ózeniniń Belaıa, Podstepka, Teplaıa, Túlki, Karatýn, Talınka jáne Orlovka sııaqty tarmaqtaryn óńdeý úshin qosymsha 15 motorly qaıyq tartylady.
Óńirge qajetti preparattardyń barlyq kólemi jetkizildi: bıologııalyq - 182 myń kg jáne hımııalyq - 14,6 myń lıtr. 293 myń lıtr bıopreparattyń jumys sýspenzııasy daıyndaldy.
9 sáýirden bastap ýaqytsha sý aıdyndaryn jerden óńdeý bastalǵan. Sonymen qatar jertólelerdi dezınsektsııalaý jalǵasyp jatyr.
Eske sala keteıik, bıyl Pavlodarda shybyn-shirkeıge qarsy 172 myń gektar alqap óńdeledi.