Pavlodarǵa qymbat kartop qaıdan keldi

PAVLODAR. KAZINFORM - Pavlodarlyq tutynýshylar keı jerlerde kartoptyń kelisi 300 teńgege deıin qymbattap shyǵa kelgenine alańdaýshylyq tanytty.

Jergilikti bılik ókilderiniń aıtýynsha, ol Grýzııadan jetkizilgen. Jańa jyldyq meıramnan soń Pavlodardyń birneshe iri dúkeninde kartoptyń baǵasy 250 teńgeden bastalatyny tańǵaltty.

Buǵan deıin kartop baǵasy 140-150 teńden aspaıtyn. Bılik ótken kúzde mol ónim jınalǵanyn, qysta ónim jetkilikti bolatynyn habarlaǵan. Endeshe bul qalaı bolǵany? Anyqtalǵandaı, áleýmettik dúkenderdegi kartop baǵasy qymbattamaǵan. Turaqtandyrý qoryna salynǵan ónim jetkilikti.

- Bıylǵy qańtar aıynyń basynda oblysqa Grýzııadan kartop partııasy kelip tústi. Bólshek saýda jelisindegi ımporttyq taýardyń baǵasy 250 teńgeden astamdy quraıdy. Al oblystyń turaqtandyrý qorynda shamamen 4 myń tonna kartop bar. Bul ónimdi satý turaqtandyrý qorynyń áriptes dúkenderinde jáne «Jailau» fermerlik naryǵynda júzege asyrylady. Aldaǵy kúnderi Turaqtandyrý qorynan kartop «Small» sýpermarketter jelisine jetkiziledi. Oblystyń aýylsharýashylyq taýarlaryn óndirýshilerimen jasalǵan memorandým sheńberinde kartopty áleýmettik dúkenderge jetkizý turaqty júrgiziledi. Tutynýshylar úshin pavlodarlyq kartoptyń baǵasy 120-140 teńge. Іshki naryqty qamtamasyz etý úshin ónimniń jetkilikti kólemi bar, - dep habarlady óńirlik kásipkerlik basqarmasynan.

Byltyr aımaqtyń kókónis ósirýshileri 768,6 myń tonna kartop jınaǵan. Onyń 360 myń tonnasy qoımalarǵa salynǵan.

Eske sala keteıik, Pavlodarlyq fermerler kartoptyń baǵasyn 120 teńgeden asyrmaýǵa ýáde bergen