Pavlodardaǵy mektep ashanasynda oqýshylardyń ýlanýy: Tekserý nátıjesi belgili boldy

PAVLODAR. QazAqparat - Sharbaqtydaǵy mektep ashanasynda jappaı ýlanýǵa qatysty tekserý nátıjesi belgili boldy. Materıaldar polıtsııaǵa joldandy, dep habarlaıdy Pavlodarnews.kz.

Sanıtarlyq epıdemıologtar balalardyń jappaı ýlanýynan keıin Sharbaqty aýdany ortalyǵyndaǵy №2 orta mekteptiń ashanasyn jospardan tys tekserýdi aıaqtady.

Mamandar mıkrobıologııalyq zertteýler júrgizý úshin shaıyndylardy alǵan. Tamaq ázirleıtin qyzmetkerlerdiń tazalyǵy da tekserildi. Sondaı-aq sýdy, paıdalanylatyn ónimder – qaraqumyq pen alma shyrynyn, kókónisterdi tekserdi. Biraq zerthanalyq taldaý nátıjeleri qalypty normada boldy.
Soǵan qaramastan zań buzýshylyqtar anyqtaldy. Sanıtarlyq epıdemıologtar ashananyń nashar zalalsyzdandyrylatynyn, ishinde shybyn-shirkeı ushyp júrgenin, jemis-jıdek pen kókónisterdiń sapasy men qaýipsizdigine qatysty qujattardyń joqtyǵyn, aspazdyń jumys isteýge ruqsaty bolmaǵanyn anyqtady.
« Tekserý kezinde naqty beriletin tamaq mázirge sáıkes kelmedi. Ydys jýýǵa arnalǵan orynda úsh satyly jýý kózdelgen. Úshinshi bólimde ystyq jáne sýyq sý berilmeıdi. Tekserý kezinde tońazytqyshtar termometrsiz bolǵan», - delingen habarlamada.

Shetteri ketilgen tabaqtar, jarylǵan zat týraıtyn taqtalar, aspazdyń tyrnaqtary lakpen boıalǵany da zań buzýshylyq dep tanyldy.
Ashanaǵa qyzmet kórsetetin jeke kásipkerge bul ereje buzýshylyqtardy túzetýge uıǵarym berildi. Tekserý materıaldary polıtsııaǵa tapsyryldy. Atalǵan fakti boıynsha QR ÁQBtK-niń 425-babynyń birinshi bóligi boıynsha tergeý júrgizilýde. Kásipkerdi 704 myń teńgeden astam aıyppul kútip tur.
Eske salaıyq, buǵan deıin Sharbaqty aýdanyndaǵy 9 oqýshy astan ýlanyp qalǵan bolatyn.