Pavlodardaǵy kolledjde plastıkten jasalǵan buıymdar óndirisi iske qosylmaq
Pavlodar oblysynyń ákimi Ábilqaıyr Sqaqov óńirdegi birneshe tehnıkalyq jáne kásiptik bilim beretin oqý orynynda boldy.
Hımııa-mehanıkalyq kolledjinde aımaq basshysy hımııa klasteri kásiporyndaryna qajetti mamandar daıarlaý barysymen tanysty. Oqý orny stýdentteriniń óndiristik tájirıbeden ótip, keıin jumysqa ornalasatyn «Pavlodar munaı-hımııa zaýyty» JShS, «Kaýstık» AQ jáne basqa da zaýyttar, kásiporyndarmen uzaq jyldar boıy yntymaqtasyp keledi. Kolledjde qyzmetterin pavlodarlyq kásiporyndar paıdalanatyn birneshe sertıfıkattalǵan zerthana jumys isteıdi.
«2013 jyldan bastap jumys istep kele jatqan bizdiń tehnoparkta bıyldan bastap jumyskerlerdi «Jas maman« baǵdarlamasy boıynsha daıarlaımyz. Munda stýdentter teorııalyq bilim alyp, slesar jáne mehanıka praktıkasynan ótedi. Olar mashınıst, apparatshy jáne jóndeýshi slesar mamandyǵyn meńgerip, kez kelgen óndiriske shyǵa alady», - dep habarlady oqý ornynyń basshysy Gúlnar Amanjolova.
Endi kolledjde memlekettik-jekeshelik seriktestik aıasynda plastıkten jasalǵan buıymdar óndirisin bastaýǵa bolatyn resýrstyq ortalyq iske qosylmaq. Áriptes ınvestor qajetti qural-jabdyqty ornatyp, onyń negizinde tárbıelenýshilerdi oqytýǵa daıyn.
Ábilqaıyr Sqaqov jobaǵa qoldaý kórsetiletinin aıtty.
«Mundaı jobalar bilim berý júıesiniń, bıznes-qurylymdar men bıliktiń birlesip jumys jasaǵanynyń nátıjesi. Jobany tezirek iske qosý úshin «Pavlodar» áleýmettik-kásipkerlik korporatsııasyn úshinshi seriktes retinde tartýǵa bolady. Ózara is-qımyldyń bıýrokratııalyq kedergilerdi boldyrmaıtyn úlgisin qurý qajet. Naqty ıdeıa, eń bastysy – mehanızmdi pysyqtaý», - dedi ákim.
Aqparattyq tehnologııalar kolledjinde oblys ákimine «TEKRI» kompanııasy shyǵaratyn vırtýaldy shyndyq negizinde jasalǵan trenajerler kórsetildi. Oqý ornynyń túlegi Roman Kıselev qurylýyna ózi atsalysqan «Belarýs» traktoryn qurastyrý jáne bólshekteý ınteraktıvti modýlin kórsetti. Óńir basshysy zamanaýı aýyl sharýashylyǵy tehnıkasyn basqarýdy úıretý úshin osyndaı tehnologııalardy engizýdi usyndy.
«Bizdiń agrarııler osy jumysqa Grýzııa, Ýkraına jáne Belarýs mamandaryn shaqyrýǵa májbúr, sebebi bizde daıyn adamdardy taba almaı otyr. Jergilikti mehanızatorlardyń jańa úlgidegi aýyl sharýashylyǵy mashınalaryn meńgerýi úshin trenajerde daıyndyqtan ótýge múmkindikter týyndasa, jaqsy bolar edi», - dedi Ábilqaıyr Sqaqov.
Sondaı-aq, ákim aqparattyq tehnologııalar kolledjiniń sheberhanalarynda bolyp qaıtty. Onda stýdentter baǵdarlamalaýdy, robot tehnıkany jáne 3D modeldeýdi tájirıbe júzinde meńgeredi. Óńir basshysyna oqý ornynyń negizinde IT-hab qurylatyny jetkizildi.
«IT-hab bıznes-ınkýbatordan, quzyretter ortalyǵynan, kásibı baǵdarlaý jáne mansap ortalyǵynan quralmaq. Sonymen qatar, biz múgedektigi bar oqýshylar úshin qoljetimdi orta qurǵymyz keledi. IT-hab jumysyna qajetti oqytýshylar quramy bizde bar», - dedi oqý ornynyń basshysy Serik Jartybaev.
Elektronıka jáne kommýnıkatsııalardyń joǵary kolledjinde aımaq basshysy utqyr robot tehnıkasy, pılotsyz ushý apparatyn basqarý, elektronıka jáne t.b. zerthanalarynda boldy. Oqý ornynda stýdentter talshyqty-optıkalyq jelilerdi montajdaýdaǵy tájirıbe jınaqtaıtyn «polıgon» jumys isteıdi. Bul oqýshylardyń óndiriske shyǵý kezindegi múmkindikterin arttyrady. Kolledj túlekteri jergilikti iri telekommýnıkatsııa kásiporyndary tarapynan suranysqa ıe.
