Pavlodardaǵy eki márte qazyna tabylǵan úıdiń tarıhy
PAVLODAR. KAZINFORM – Aǵaıyndy Sorokınderdiń úıi 1890 jyly salynǵan. Alaıda tóńkeris bastalǵanda úı ıeleri Pavlodardan ketip qalady. Sol ýaqyttan beri kóne ǵımarattan eki márte qazyna tabylǵany týraly ańyzdar aıtylyp júr.
Aǵaıyndy Vladımır men Semen Sorokınder Pavlodarda kópesterdiń gúldengen kezeńinde ómir súrgen. Otbasy asa dáýletti bolǵan, baılyǵy jaǵynan tek belgili kópes ári qala basshysy Artemıı Derovqa ǵana jol bergen.
Qazirgi Astana kóshesinde ornalasqan bul úı eki qojaıynǵa arnap salynǵan. Bastapqyda úıdiń eki esigi bolypty: biri ortalyq jaqtan, ekinshisi aýladan kiretin.
Tóńkeris bastalǵanda Sorokınder otbasy Ombyǵa kóship ketedi de, aýmaǵy 500 sharshy metrden asatyn úı bıliktiń ıeligine ótedi. Keıinirek bul úıden qazyna tabylǵany týraly ańyzdar bar ári olar shyndyqqa janasýy ábden múmkin.
– Tóńkeris kezinde qojaıyndary joǵalyp ketken soń, bul ǵımaratta alǵashqyda halyq soty, kommýna sheberhanalary, al 1920-jyldary Krýpskaıa atyndaǵy balalar úıi ornalasty. Kópes Sorokınderdiń kezinde munda qazyna jasyrǵanyna senimdi bolǵan jergilikti jastar úıdiń qabyrǵalaryn soqqylap júrip, kútpegen jerden altyn tıyndar býylǵan jasyryn oryndy taýyp alady. Al jergilikti bılik bul qazynany álemdik tóńkeristiń jeńisine jumsaımyz dep tárkilep áketedi, - dep áńgimeledi pavlodarlyq ólketanýshy Lıýdmıla Baıýsheva.
Ekinshi qazyna 1944 jyly tabylǵan. Ol kezde ǵımaratta eki mekeme ornalasty: ólketaný mýzeıi jáne balalar mýzyka mektebi. Mýzykanttar ózge orynǵa kóship, tutas ǵımarat mýzeı qyzmetkerlerine qalady. Olar jóndeý jumystaryn júrgize bastaıdy. Peshterdiń birin buzý kezinde jumysshylar ishi altyn tıyndarǵa toly qumyra taýyp alady. Biraq bul týraly eshkimge tis jarmaıdy.
– Aıaq astynan tabylǵan qazyna týraly qaýeset kóp ýaqyt ótpeı basshylyqtyń qulaǵyna jetedi. Alaıda bul kezde bári kesh edi, pesh qalaýshylar altyn toly qumyramen is-túzsiz joǵalyp ketkeni anyqtalady. Jalpy ótken ǵasyrdyń alǵashqy jartysynda jergilikti qazyna izdeýshilerdiń biri Pavlodar qazynalarynyń kartasyn jasaǵan degen sóz bar. Onyń qaıda jasyrylǵanyn eshkim bilmeıdi. Bálkim, ýaqyt óte kele bul qupııa da ashylar, - dep qosty Lıýdmıla Baıýsheva.
Qazir Sorokınder úıinde Potanın atyndaǵy oblystyq tarıhı-ólketaný mýzeıiniń qorlary ornalasqan. Buǵan qosa, onyń janynda «Flıgel» degen ataýmen tanymal taǵy bir tarıhı úı bar. Ony da Sorokınder otbasy aǵaıyndylardyń biriniń uly úshin salǵan. Eki ǵımarat ta jergilikti mańyzy bar tarıhı jáne mádenı eskertkishteriniń sanatynda.
Buǵan deıin Pavlodarda áıgili fotosýretshiniń mýzeı-úıiniń qazirgi jaǵdaıy týraly jazdyq.
Sondaı-aq Kerekýdegi Buqar jyraý mýzeıinde sheshimin tappaǵan qandaı máseleler bar ekenin zerdelep kórgen edik.