Pavlodardaǵy Aqkól — Jaıylma alqabyna sý bosatý sharasy bastaldy
PAVLODAR. KAZINFORM — Qanysh Sátbaev atyndaǵy sý arnasynan jyldaǵydaı Shiderti ózenine sý jiberile bastady. Jalpy kólemi 87,4 mln tekshe metr tirshilik nári saı-salany sýǵa toltyryp, Aqtoǵaı aýdany men Ekibastuzdyń aýyldyq aımaqtaryndaǵy mal ósirýshi aǵaıynnyń nesibesin eseleı túsedi.
Arnadan sý bosatý sharalarynyń jalpy uzaqtyǵy 60 kúnge ulasady. Osy aralyqta jalpy kólemi 120 mln tekshe metr sý Shiderti ózeni arqyly keń dalaǵa jóńkilip, shabyndyq úshin paıdalanylatyn kóltabandardy, Aqkól-Jaıylmadaǵy Áýlıekól kólder júıesin (shamamen 9 kól bar) tolyqtyryp, balyq resýrsyn qalpyna keltirýge oń áserin tıgizedi. Ekinshi turǵydan bul aýmaqtardyń tabıǵı balansyn ustap turýǵa, ekologııalyq ahýaldy jaqsartýǵa negizdelgen.
Óńirlik jer qoınaýyn paıdalaný, qorshaǵan orta jáne sý resýrstary basqarmasynyń basshysy Áıgerim Qabyltaevanyń aqparynsha, alǵashqy kezekte bosatylatyn 87,4 mln tekshe metr sýǵa respýblıkalyq bıýdjetten 4 mlrd teńgedeı qarajat bólingen.
—Qanysh Sátbaev atyndaǵy sý arnasynan Shiderti ózeniniń saǵasymen sý bosatý sońǵy 15-20 jylda jaqsy jolǵa qoıylyp otyr. Ońtaıly aýa raıy men topyraq ylǵalynyń jaı-kúıin eskere otyryp, 5 sáýirden sý arnasynan Shiderti ózeniniń saǵasy arqyly sý bosatyla bastady. Bıyl jalpy kólemi 120 mln tekshe metr sý jiberilýi kerek. Qazir respýblıkalyq bıýdjetten qosymsha qarajat suralyp otyr. Suranysymyz oryndalsa, qazirgi 87,4 mln tekshe metrden bólek, taǵy 32,6 mln tekshe metr sý jiberiledi. Nátıjesinde josparymyz oryndalady. Bul ótken jylǵy mejemen teń ári sý jiberý sharalary ádettegideı úsh birdeı gıdroqurylǵy arqyly júzege asatynyn eskertkim keledi. Negizgi sý kólemi № 112 gıdroqurylǵy arqyly ótedi. Ózge bóligi № 108 jáne № 109 sý shyǵarý júıelerinen túsedi, - dep atap ótti basqarma basshysy Áıgerim Qabyltaeva.
Sý resýrstary komıtetiniń sý resýrstaryn paıdalaný jáne qorǵaý jónindegi «Ertis» basseındik ınspektsııasy basshysynyń orynbasary Eleýsiz Qambarov bul kólem jaratylystaný ǵylymynyń negizdemelerimen eseptelgenin jáne ol Shiderti men Óleńti aýmaqtaryn tolyǵymen sýlandyrýǵa múmkindik beredi dep kútiletinin jetkizdi. Byltyr Aqtoǵaı aýdanyndaǵy Shyǵanaq kóline alǵashqy ret 15 mln tekshe metr sý aǵyp bardy. Nátıjesinde ol jerdegi ekojúıe jaqsara tústi. Sý bosatý sharalarynyń nátıjesinde Ekibastuzdyń aýyldyq aımaǵy men Aqtoǵaı aýdanynyń aýmaǵynda jalpy kólemi 21 myń gektardan astam shabyndyq alqaptardy sý basatyn bolady. Osy eki aımaqtyń irgeles qonǵan eldi mekenderinde 50 myńnan astam mal bar. Turǵyndar qoldaǵy túlikterine jaz ben kúzde mal azyǵyn jetkilikti jınap alady.
Al Ertis ózenine sý jiberý sharalary shamamen 15-16 sáýirge josparlanyp otyr. Salaaralyq komıssııa kelesi aptada arnaıy jıyn ótkizip, bıyl qansha sý jiberiletinin anyqtaýy kerek. Qazirgi ýaqytta Buqtyrma men Shúlbi sý qoımalarynyń kemerine kelip turǵany habarlandy. Shúlbiden tómenge qaraı aqyryndap sý jiberilip jatyr. Mamandar bıyl Ertis ózeni jaıylmalarynyń kemi 70 paıyzyn sý basady dep boljap otyr.
Eske sala keteıik, Bıyl Ertiske sý bosatatyn ózen basseınderinde ylǵal jetkilikti.
