Pavlodarda jyl basynan beri 32 ekonomıkalyq zańbuzýshylyq tirkeldi
PAVLODAR. KAZINFORM – Óńirde jyl basynan beri ekonomıkalyq zańbuzýshylyq boıynsha 32 is tirkelgen. Qazirgi kúni onyń 12-si sotqa jiberilgen. Keltirilgen zalal somasy – 1,2 mlrd teńge.
Pavlodar oblysy boıynsha ekonomıkalyq tergep-tekserý departamenti 2023 jyly 15 isti tergegen. Onyń 12-si sotqa jiberilgen. Nátıjesinde memleketke 348 mln teńge zalal kelgeni anyqtalyp, 14 adam sottalǵan. Al, jyl basynan sotqa deıingi 32 tergeý tirkelip, onyń 12-si sotqa jiberildi.
Departamenttiń ekinshi jedel basqarmasy basshysynyń orynbasary Nıkolaı Pahomovtyń aıtýynsha, QR Qylmystyq Kodeksiniń 189-baby boıynsha 15 qylmystyq is tirkelip, onyń 14-i sotqa joldanǵan. Memleketke keltirilgen zalaldyń jalpy somasy 1,2 mlrd teńgeni qurady (8 adam sottaldy).
– Máselen, departamentpen «Qazaqstan Temir Joly» UK» AQ «Soltústik» óńirlik fılıaly Pavlodar ýchaskesi bastyǵynyń zańsyz qyzmeti áshkerelendi. Ol óziniń laýazymdyq jaǵdaıyn júıeli negizde paıdalana otyryp, qyzmet boıynsha jalpy qamqorlyǵy úshin zańsyz aqshalaı syıaqy alǵan. Sot azamattyń bas bostandyǵyn 3,6 jylǵa shektedi. Al «Pavlodar qalasynyń balalar-jastar sport ortalyǵy» mekemesinde aldyn ala sóz baılasý boıynsha bir top adam eńbekaqyny jáne ózge de tólemderdi zańsyz aýdarý jolymen jalpy somasy 15 mln teńgeden astam bıýdjet qarajatyn urlaǵany anyqtalǵan, - deıdi Nıkolaı Pahomov.
Buǵan qosa «Bogatyr-Kómir» JShS-de 2020-2022 jyldar aralyǵynda júıeli negizde aqsha qarajatyn urlaýmen aınalysyp kele jatqandardyń isteri áshkere boldy. Olar tehnıkalardyń eski qosalqy bólshekterin jańa dep kórsetip, kásiporynǵa ákelip otyrǵan. Kásiporynǵa keltirilgen zalal – 120 mln teńge. Kináli tulǵalar ustalyp, 6 jyl merzimge bas bostandyǵyn shekteý túrindegi jaza taǵaıyndaldy.
Eske sala keteıik, Esirtki qylmysy úshin 28 pavlodarlyq uzaq jylǵa sottaldy.
