Pavlodarda jer qoınaýyn paıdalanýǵa arnalǵan lıtsenzııalar zańsyz resimdelgen
PAVLODAR. KAZINFORM — Prokýrorlar oblys aýmaǵynda jer qoınaýynan qazba baılyqtardy óndirý ruqsat qujattarynsyz júzege asyrylyp jatqanyn anyqtady.
Mysaly, Baıanaýyl aýdanynda «IBM Gold» JShS osy jyldyń basynan beri ekologııalyq ruqsatsyz altyn men kúmis óndirýmen aınalysqan.
— Jer qoınaýyn zańsyz paıdalanǵan taǵy 11 kásiporyn anyqtaldy. 8 jaǵdaıda paıdaly qazbalardy óndirý jumystary kelisimsharttyq aýmaqtardan tys jerlerde júrgizilgen. Sonymen qatar, kelisimsharttardyń merzimin zańsyz uzartý faktileri de belgili boldy, — dep habarlady óńirlik prokýratýradan.
Quzyrly organ atap ótkendeı, atalǵan baǵyttaǵy memlekettik baqylaýdaǵy buzýshylyqtar men olqylyqtar oblys prokýratýrasynyń alqa otyrysynda talqylanǵan.
Alqa qorytyndysy boıynsha zań buzýshylyqtardy anyqtaý men jolyn kesý sapasyn arttyrýǵa baǵyttalǵan memlekettik jáne quqyq qorǵaý organdarynyń ózara is-qımylynyń algorıtmi ázirlengen.
Eske sala keteıik, elimizdiń birqatar óńiriniń prokýrorlary taǵaıyndaldy.