Pavlodarda jeke úı men monsha órtendi
PAVLODAR. KAZINFORM - Órt sóndirýshiler 27 lıtrlik gaz ballonyn ýaqytynda shyǵaryp úlgerdi. Tilsiz jaý jalpy aýmaǵy 250 sharshy metrdi sharpyǵan.
Pavlodar qalasynyń irgesindegi Kenjekól aýylynda úsh bólmeli úıdiń jáne oǵan japsarlas salynǵan monshanyń aǵash shatyry órtengen.
«Kenjekól aýylynda jeke úıdiń órtenip jatqany habar tústi. Oqıǵa ornyna jedel barǵan órt sóndirýshiler monshadaǵy bý qabyldaý bólmesinen 27 lıtrlik gaz ballonyn alyp shyǵyp, jarylystyń aldyn aldy. Pavlodar qalasynyń №3 ÓSB qutqarýshylary úıdegi turmystyq tehnıka, korpýsty jáne jumsaq úı jıhazdaryn dalaǵa shyǵardy. Oqıǵa ornynda órt sóndirý qyzmetiniń jeke quramynan 36 adam men 11 tehnıka, qalalyq jeliler mekemesi men «102» qyzmeti áreket etti», dep habarlady Pavlodar oblysy tótenshe jaǵdaılar departamentiniń baspasóz qyzmetinen.
Órttiń jalpy aýmaǵy 250 sharshy metrdi qurady. Órttiń sebep-saldary anyqtalyp, keltirilgen shyǵyn eseptelip jatyr.
