Pavlodarda jazǵy ýaqytta 47 jaǵajaı ashylady
PAVLODAR. KAZINFORM - Jaǵajaılardy maýsymǵa daıyndaý úshin bıýdjetten 93 mln teńge bólingen. Tótenshe jaǵdaılar qyzmetiniń ókilderi barlyq jaǵajaıdaǵy sýdyń túbin zerdelep shyǵýdy josparlap otyr.
Aldaǵy jazda Pavlodar oblysynyń aýmaǵynda 47 jaǵajaı resmı túrde jumys isteıdi dep josparlanyp otyr. Buǵan qosa oblys aýmaǵynda 122 karkasty-modýldik basseınder bar. Tótenshe jaǵdaılar qyzmetiniń mamandary «Baqytty balalyq shaq» qaýipsizdik mektebin uıymdastyryp, apta saıyn balalar men eresekter úshin sýdaǵy qaýipsizdik erejelerin, júzýdi jáne alǵashqy dárigerge deıingi kómek kórsetýdi úıretetin bolady.
«Aldaǵy sýǵa túsý maýsymyna baılanysty daıyndyq jumystaryn júrgizýge jergilikti bıýdjetten 93 mln teńge bólý josparlanǵan. Bul qarajat azamattardyń qaýipsizdigin qamtamasyz etýge jáne jaǵajaılardy abattandyrýǵa jumsalady. Jaz boıy múddeli organdarmen, eriktilermen birlesip sý aıdyndarynda qaýipsizdik erejelerin buzýdyń aldyn alý maqsatynda reıdtik profılaktıkalyq is-sharalar júrgiziletin bolady. Azamattarǵa saqtyq sharalaryn jıi-jıi eskertip otyramyz. Sondaı-aq bilim berý uıymdarymen de jumys istep jatyrmyz», - deıdi Pavlodar oblysy tótenshe jaǵdaılar departamenti azamattyq qorǵanys basqarmasynyń ofıtseri Temirlan Japalbaı.
Sýǵa túsý maýsymy bastalǵanǵa deıin jergilikti ákimdikterdiń ótinimi boıynsha tótenshe jaǵdaılar departamenti jaǵajaılardaǵy sýdyń túbin zerdelep shyǵady. Oblysta ázirshe mundaı ótinim bergender joq. Negizgi daıyndyq mamyr aıynyń ekinshi jartysynan bastalady dep kútilip otyr.
Temirlan Japalbaıdyń aıtýynsha, ótken jyly oblysta 6 adam sýǵa batyp ketken, olardyń úsheýi - qaraýsyz júrgen balalar. Adamdar kóbine arnaıy jabdyqtalmaǵan jerlerde nemese ruqsat etilmegen ýchaskelerde tilsiz jaýdyń qurbany bolady.
