Pavlodarda jańa týǵan sábıin óltirgen stýdentke úkim shyqty

PAVLODAR. KAZINFORM – Pavlodarda jańa týǵan nárestesin óltirgen 19 jastaǵy stýdentke qatysty sot úkimi shyqty.

Sot materıaldaryna sáıkes, boıjetken bir jarym jyl boıy jigitimen qarym-qatynasta bolǵan. Júktiligi belgili bolǵan kezde jigit balaǵa jaýapkershilik almaıtynyn aıtqan. Qyz týystarynyń sógisinen qorqyp, júktiligin jasyryp, dárigerge júginbegen.

2025 jyldyń qazan aıynda stýdent jataqhananyń jýynatyn bólmesinde qyz balany dúnıege ákelgen.

Sot úkiminde kórsetilgendeı, bosanǵannan keıin psıhologııalyq kúızelis jaǵdaıynda bolǵan qyz sábıdiń jylaǵan daýysy estilip qalady dep qaýiptenip, qylmys jasaýǵa barǵan.

– Sottalýshy jańa týǵan sábıdi súlgige tolyq orap, tynys alý joldaryn jaýyp tastaǵan. Sonyń saldarynan náreste shetinep ketken, – dep kórsetilgen Pavlodar qalasynyń qylmystyq ister jónindegi aýdanaralyq sotynyń úkiminde.

Іs Qylmystyq kodekstiń «Psıhotravmalyq jaǵdaıda anasynyń jańa týǵan balasyn óltirýi» babymen qaraldy.

Aıyptalýshy óz kinásin tolyq moıyndap, ózin bas bostandyǵynan aıyrmaýdy suraǵan. Jeńildetetin mán-jaılardy eskere otyryp, sot oǵan eki jyl merzimge bostandyǵyn shekteý jazasyn taǵaıyndady.

Eske salaıyq, buǵan deıin Aqmola oblysynyń Qosshy qalasynda jol jıeginen jańa týǵan sábı salynǵan paket tabylyp, osy derek boıynsha tergeý bastalǵany habarlanǵan.