Pavlodarda izdeýde júrgen 15 qylmysker ustaldy

  PAVLODAR. KAZINFORM — Olardyń ishinde tonaý, urlyq, zorlyq-zombylyq, jol-kólik oqıǵalary, kólik urlyǵy jáne esirtki qylmystary boıynsha izdeýde júrgender bar.

Jyl basynan beri Pavlodar oblysy polıtsııasynyń jedel qyzmetkerleri ártúrli qylmystarǵa qatysty tergeý organdarynan jasyrynǵan qylmyskerlerdiń ornyn anyqtaǵan. Іzdeýde júrgen barlyǵy 15 qylmyskerdiń izin kesip, qolǵa túsirgen.

— Ustalǵan qylmyskerlerdiń ishinde tonaý, urlyq, zorlyq-zombylyq, jol-kólik oqıǵalary, kólik urlyǵy jáne esirtki qylmystary boıynsha izdeýde júrgender bar. Mysaly, týǵan elinde jol-kólik oqıǵasyn jasap, qarjyny jymqyrǵany úshin izdeýde júrgen Tájikstan Respýblıkasynyń azamaty ustaldy. Ustalǵan adam ýaqytsha ustaý ızolıatoryna qamaýǵa alyndy. Dýshanbedegi áriptesterimizge habar berildi, — dep málimdedi Pavlodar oblystyq polıtsııa departamentinen.

Tártip saqshylary ádiletten qashyp qutylýdyń eshbir joly joq ekenin aıtady. Qashqyndar tipti shetelde jasyrynsa da, jasaǵan áreketteri úshin jaýapkershilikten qutylmaıdy.

Eske sala keteıik, ótken jyly elimizde izdeýde júrgen 1600-ge jýyq qylmysker ustaldy.