Pavlodarda sý tasqynynan zardap shekkenderdiń bári ótemaqy aldy
ASTANA. KAZINFORM — Pavlodar oblysynda sý tasqynynan kelgen zalal boıynsha barlyq ótinim qanaǵattandyrylǵan. Bul týraly óńir ákimi apparatynyń basshysy Dıdar Ibraev aıtyp berdi.
«10 sáýir saǵat 16:00–degi jaǵdaı boıynsha aımaqta sý basqan úı joq. 2-6 sáýir kúnderi TJ rejımi jarııalanǵan Aqtoǵaı aýdanynyń Jalaýly aýylynda úılerdi jyl saıyn sý basý problemasyn sheshý úshin óńirlik jedel shtab syıymdylyǵy 200 myń tekshe metr sý bolatyn 3 jańa qazanshuńqyr ornatý týraly sheshim qabyldady. Bul bolashaqta aýyldy sý basý qaýpi bar problemany keshendi túrde sheshýge múmkindik beredi. Táýlik boıy 12 aýyr tehnıkamen qazanshuńqyrlardy ornatý jumystary júrgizilýde», — dedi D. Ibraev ortalyq kommýnıkatsııalar qyzmetinde ótken baspasóz máslıhatynda.
Turǵyn úılerdi sý basý qaýpi tolyǵymen joıyldy, jaǵdaı turaqtandyryldy.
«Búgingi tańda 107 otbasy bıýdjetten tys demeýshilik qarajattan 96,7 mln teńge ótemaqy aldy. Onyń ishinde, keshe ǵana sý tasqyny kezinde úıleri qatty zardap shekken Jalaýly aýylynyń 9 turǵyny bar. Sondaı-aq, Jalaýly aýylynda komıssııa sheshimimen qalpyna keltirýge jatpaıtyn apatty úılerdiń ornyna salynatyn 5 jańa úıdiń qurylysy bastaldy. Shyǵyndy ERG toby óz moınyna aldy. Úı qurylysyn 3 aıda aıaqtaý josparlanyp otyr», - dedi spıker.
Budan basqa, osy aptada zardap shekkenderge 100 AEK mólsherinde birjolǵy memlekettik áleýmettik tólem tólenedi.
«Osylaısha, oblys turǵyndaryna sý tasqynynan keltirilgen zalal kelip túsken ótinimder boıynsha tolyq kólemde óteldi. Bul rette ótinimderdi qabyldaý sáýir aıynyń sońyna deıin jalǵasady, eshkim de nazardan tys qalmaıdy», - dedi D. Ibraev.
