Pavlodarda Sátbaev sý arnasynyń toraptarynan balyq aýlaýǵa ruqsat beriledi

PAVLODAR. KAZINFORM — Sý arnasyn jalǵa alýshylar aldaǵy kúnderi áýesqoı balyqshylarǵa arnalǵan joldamalardy úlestirýi tıis. Óıtpegen jaǵdaıda jaýapty basqarma tabıǵat paıdalanýshylarmen aradaǵy shartty buzýy múmkin.

Q.Sátbaev atyndaǵy sý arnasynyń № 1-8 sý toraptaryn paıdalanyp otyrǵan sýbektiler buǵan deıin balyq aýlaý joldamasyn bermeı qoıǵan edi.

Myńdaǵan áýesqoı balyqshy olardyń ústinen memlekettik organdarǵa shaǵym túsirdi.

«Pavlodar oblysyndaǵy tabıǵatty qorǵaý prokýrorynyń úılestirýimen jer qoınaýyn paıdalaný, qorshaǵan orta jáne sý resýrstary basqarmasy arnaıy jıyn ótkizip, onda balyq aýlaýdy uıymdastyrý máselesi talqylandy. Іs-sharaǵa Zaısan-Ertis basseın ınspektsııasynyń, „Qazaq balyk“ balyq sharýashylyǵy jáne akvamádenıet qaýymdastyǵy fılıalynyń, Q.Sátbaev arnasy fılıalynyń, sondaı-aq Ekibastuz qalasyndaǵy aýyl sharýashylyǵy bóliminiń ókilderi qatysty. Keńes qorytyndysy boıynsha tabıǵat paıdalanýshy sýbektige jaqyn arada joldama berý júıesin qaıta jańǵyrtý týraly tapsyryldy. Óıtpegen jaǵdaıda balyq sharýashylyǵyn júrgizýge arnalǵan shart toqtatylýy múmkin» dep habarlady óńirlik jer qoınaýyn paıdalaný, qorshaǵan orta jáne sý resýrstary basqarmasynyń basshysy Áıgerim Qabyltaeva.