Pavlodarda iri kólemde para alǵan sheneýnik 3 jylǵa sottaldy
PAVLODAR. KAZINFORM - Laýazymdy tulǵa jergilikti iri kásiporynǵa iri aıyppuldardan qutylýǵa, sondaı-aq ónerkásiptik qaýipsizdik tekserýlerin ońaı ótýge kómektespek bolǵan. Sottalýshy óz kinásin moıyndap, úsh jylǵa bas bostandyǵynan aıyryldy.
QR Tótenshe jaǵdaılar mınıstrligi Ónerkásiptik qaýipsizdik memlekettik departamentiniń Pavlodar oblysy boıynsha salaaralyq baqylaý jáne qadaǵalaý departamentiniń bólim basshysy 1,4 mln teńge para alǵany úshin 3 jylǵa sottaldy. Ol «KSP Steel» JShS-ne iri aıyppuldardan qutylýǵa, sondaı-aq ónerkásiptik qaýipsizdik tekserýlerin ońaı ótýge kómektespek bolǵan.
«Sottalýshy 2021 jyldyń jeltoqsany men 2023 jyldyń qarashasy aralyǵynda Pavlodar oblysy boıynsha salaaralyq baqylaý jáne qadaǵalaý departamentiniń bólim basshysy qyzmetin atqarǵan. Qazaqstan Respýblıkasynyń ónerkásiptik qaýipsizdik salasyndaǵy zańnamasynyń saqtalýyna tekserý júrgizý jáne jaýapty tulǵalardy ákimshilik jaýapkershilikke tartý jónindegi sharalardy qoldanbaǵan. Bul úshin «KSP Steel» JShS bas tehnıkalyq basshysynan 1 mln 399 myń teńge somasynda para alǵan», dep habarlady Pavlodar qalalyq №2 sotynyń sýdıasy Ásemqońyr Saıran.
Sheshim zańdy kúshine engen joq.
Eske sala keteıik, elge esirtki tasymaldap kelgen transulttyq top músheleri sottaldy.
