Pavlodarda órtengen úıden er adamnyń múrdesi tabyldy
PAVLODAR. KAZINFORM - Baspananyń ıesiz turǵan ǵımarat ekeni anyqtaldy. Tilsiz jaýdy aýyzdyqtaýǵa 16 adam men 4 tehnıka jumyldyrylǵan.
Bul týraly óńirlik Tótenshe jaǵdaılar departamentinen habarlandy.
«15 aqpan kúni saǵat 12.48-de Pavlodar qalasynda 2-ótkel mekenjaıy boıynsha jeke úıdiń órtengeni týraly habarlama kelip tústi. Úı ıesiz turǵan. Órt sóndirýshiler jedel jetip, birden jalyndy aýyzdyqtaýǵa kiristi. Órttiń jalpy aýdany – 30 sharshy metr. Oqıǵa ornynan 1985 jyly týǵan er adamnyń múrdesi tabyldy», - dep málimdedi departamenttiń baspasóz qyzmetinen.
Tilsiz jaý saǵat 14.44-te tolyqtaı sóndirildi. Oqıǵa ornynda jeke quramnyń 16 qyzmetkeri jáne 4 tehnıka jumys istedi. Arnaıy organdar úı ishinen tabylǵan er adamnyń kim ekenin anyqtap, ólim sebebin tekserip jatyr.
