Pavlodarda orfandyq aýrýǵa shaldyqqandar kóbeıgen

PAVLODAR. KAZINFORM – Pavlodarda orfandyq aýrýǵa shaldyqqandar qatary artty. Dárigerler muny dıagnostıkanyń jaqsarýymen jáne tirkeý júıesiniń keńeıýimen baılanystyrady.

Qazirgi ýaqytta Ertis-Baıan óńirinde orfandyq aýrýlarǵa shaldyqqan 1472 adam esepte tur, onyń ishinde 390-y – bala. Tek bıyl jańadan 233 adam adamǵa atalǵan dert anyqtalǵan (onyń ishinde 6-aýy bala).

- Búgingi kúni ambýlatorııalyq patsıentterge kepildendirilgen tegin medıtsınalyq kómektiń kólemi jáne mindetti áleýmettik medıtsınalyq saqtandyrý aıasynda óńir turǵyndary jalpy somasy 12,9 mlrd teńgege dárilik zattarmen qamtamasyz etilgen. Onyń ishinde orfandyq patsıentterge 3 mlrd teńgeden astam qarajat baǵyttalǵan, - deıdi óńirlik densaýlyq saqtaý basqarmasy basshysynyń orynbasary Aıgúl Muqysheva.

Sońǵy jyldary jurtshylyq arasynda orfandyq aýrýlardyń ósýi baıqalǵan, bul dıagnostıkanyń jaqsarýy jáne tirkeý júıesiniń keńeıýimen baılanysty deıdi mamandar. 2026 jylǵa dárilik qamtamasyz etýge, onyń ishinde orfandyq patsıentterge arnalǵan aldyn ala bıýdjettik ótinim somasy - 16,4 mlrd teńge bolyp otyr. Sonyń ishinde tek qana 24 orfandyq patsıentti (dıýshenn bulshyq et dıstrofııasy, julyn bulshyq et atrofııasy, neırofıbromatoz, mýkovıstsıdoz jáne onkogematologııalyq aýrýlary) preparatpen qamtamasyz etýge 2,3 mlrd teńge kóleminde bıýdjetke qosymsha ótinim joldanǵan.

- Orfandyq aýrýlarǵa arnalǵan dári-dármek baǵasy óte qymbat turady. Bir dárilik preparattyń ortasha quny 100 myń teńgeden 2 mln teńgege deıin jetedi. Eń qymbaty - «Spınraza» (Nýsınersen) preparaty, bir patsıent úshin jyldyq quny 90 mln teńgeden asady. Ol respýblıkalyq bıýdjet esebinen satyp alynatynyn eskerý kerek. Elimizdegi ambýlatorııalyq tegin dárilik qamtamasyz etý tizbesine sáıkes 40-tan astam orfandyq aýrý boıynsha shamamen 96 ataýly dárilik zat qarastyrylǵan. Bular júıeli qyzyl jegi, ıývenıldi artrıt, kóptik mıeloma, kıstozdy fıbroz (mýkovıstsıdoz), mıastenııa, julyn bulshyq et atrofııasy, kóptik mıeloma jáne t.b. aýrýlarǵa arnalǵan, - dep qosty basqarma ókili.

Medıtsınalyq uıymdar dıspanserlik esepte turǵan patsıentter boıynsha qajettilikti óz betinshe qalyptastyryp, «SK-Farmatsııa» JShS ony jasalǵan sharttar men bekitilgen kestelerge jetkizip beredi. Preparattar negizinen Germanııa, Frantsııa, AQSh, Shveıtsarııa, Japonııa elderinde shyǵarylady.

Mamandardyń aıtýynsha, orfandyq, ıaǵnı sırek aýrýlarda adamnyń ortasha ómir súrý uzaqtyǵyn shamalap kórsetý múmkin emes. Sebebi bul aýrýlardyń ishki bólinisi alýan túrli. Belgili bir aýrýdyń boljamy onyń túrine, genetıkalyq mýtatsııasyna, aýyrlyq dárejesine, emniń qoljetimdiligine jáne terapııanyń bastalý ýaqytyna baılanysty.

Densaýlyq saqtaý basqarmasynyń ókili qazirgi ýaqytta jergilikti medıtsınalyq uıymdarda jyl sońyna deıin tapshylyq qaýpi bar preparattar boıynsha qosymsha ótinim qalyptastyrylǵanyn da atap ótti. Olar «SK-Farmatsııa» JShS arqyly satyp alynyp jatyr.

Eske sala keteıik, Pavlodar oblysynda onkologııamen aýyratyndar sany azaıyp keledi.