Pavlodarda Nursultan Nazarbaev dańǵyly paıda boldy
«Táýelsizdik dańǵyly Nursultan Nazarbaev dańǵyly dep atalatyn bolady. Mundaı usynysty Pavlodar qalasynyń ákimi Ánýar Kúmpekeev máslıhattyń kezekten tys 49-sessııasynda usyndy», - dep jazylǵan qala ákimdiginiń Feısbýk paraqshasynda.
Á.Kúmpekeev QR Tuńǵysh Prezıdentiniń elimiz damýyndaǵy tarıhı róline toqtala kele, Qazaqstandy álem aldynda moıyndatqanyn erekshe aıtyp ótti.
«Elbasy Nursultan Ábishuly Nazarbaev jańa memleketti, naryqtyq ekonomıkany qurdy, turaqty ekonomıkalyq ósimdi qamtamasyz ete otyryp, Qazaqstandy álem aldynda moıyndatty. Ortalyq Azııanyń kóshbasshysyna aınaldyrdy. Qazaqstandy eki álemdik ekonomıkalyq daǵdarystan sátti alyp shyǵyp, ornyqty memleket ekenimizdi dáleldedi. Onyń uly jobasy jańa astanany turǵyzý boldy. Sondyqtan men QR Tuńǵysh Prezıdentiniń atymen Pavlodar qalasynyń ortalyq dańǵylyn Nursultan Nazarbaevtyń atymen ataý qajet dep esepteımin», - dedi qala ákimi.
Onyń sózinshe, atalǵan sheshimniń qabyldanýy óskeleń jas urpaq tárbıesinde qazaqstandyq patrıotızm sezimin qalyptastyrýǵa septigin tıgizedi.
Óz kezeginde qalalyq máslıhattyń depýtattary bul usynysty biraýyzdan qoldady.
Ákimdik aqparatyna sáıkes, máslıhattyń birlesken sheshimi jáne ákimdik qaýlysy onomastıkalyq komıssııaǵa jiberiletin bolady.
