Pavlodarda mektep oqýshysy synyptasy men muǵalimine pyshaq saldy

PAVLODAR. KAZINFORM - Pavlodardaǵy №14 orta mektebiniń oqýshysy óz synyptasyn jáne muǵalimin pyshaqpen jaraqattaǵan. Zardap shekkender qazirgi kúni ambýlatorııalyq em qabyldap jatyr. Ómirlerine qaýip tónip turǵan joq. Bul týraly Pavlodar oblysy polıtsııa departamentinen habarlady.

- Pavlodar qalasynyń mektep oqýshysy ustaldy. Ol synyptasyna, sondaı-aq muǵalimge pyshaq saldy. Atalǵan fakti boıynsha qylmystyq is qozǵaldy. Qazirgi ýaqytta qajetti tergeý áreketteri júrgizilip jatyr, - dedi oblystyq polıtsııa departamenti basshysynyń orynbasary Jasqaırat Qaıyrov.

Tergeý múddesi úshin basqa aqparat jarııa etilmedi.

Al Pavlodar oblysy densaýlyq saqtaý basqarmasynyń baspasóz qyzmeti zardap shekken áıel adam men kámelet jasyna jetpegen er bala qazirgi ýaqytta jergilikti aýrýhanalarda em qabyldap jatqanyn jetkizdi. Belgili bolǵandaı, mektep muǵaliminiń ıyǵy men keýdesi, oqýshynyń arqasy, jaýyryn bóligi jáne ıyǵy jaraqattalǵan.

«Olardy travmatolog pen hırýrg qarap shyqty. Jaralaryn emdep, aseptıkalyq tańǵyshtar qoıyldy. Naýqastardyń jalpy jaǵdaıy qanaǵattanarlyq, ambýlatorııalyq emdelýge jiberildi. Zardap shekkenderdiń ómirine qaýip joq», - dep málimdedi baspasóz qyzmetinen.

Eske sala keteıik, Jambyl oblysynda 8-synyp oqýshysy kóshedegi ájethanada qaıtys boldy.

Túrkistan oblysynda jolda oqýshylar mingen «Gazel» órtenip ketti.