Pavlodarda «Mártebeli til - máńgilik el» atty dóńgelek ústel ótti

PAVLODAR. QazAqparat - Pavlodarda Elbasynyń «Bolashaqqa baǵdar: rýhanı jańǵyrý» baǵdarlamalyq maqalasyn iske asyrý sheńberinde «Mártebeli til - máńgilik el» atty dóńgelek ústel ótti, dep habarlaıdy pavlodarnews.kz.

Jıynǵa oblystyń etnomádenı birlestikteriniń jetekshileri, úkimettik emes uıymdarynyń ókilderi, Halyqaralyq «Qazaq tili» qoǵamy oblystyq fılıalynyń músheleri, til janashyrlary, memlekettik tildi jetik meńgergen oblystyń etnos jastary, respýblıkalyq konkýrstardyń jeńimpazdary men latynsha dıktantty úzdik jazǵandar shaqyryldy. Otyrystyń kún tártibinde óńirdegi til saıasatynyń júzege asyrylýy men qol jetkizgen mańyzdy jetistikteri, latyn álipbıine kóshýdiń mańyzdylyǵy men ony odan ári halyq arasynda nasıhattaý joldary talqylanyp, tildiń búgingisi men keleshegi jaıynda tereń oı-pikirler tilge tıek etildi. Atalǵan sharada Pavlodar oblysynyń tilderdi damytý jónindegi basqarmasynyń basshysy Sáýle Osmanova, Pavlodar oblysy Qazaqstan halqy Assambleıasy tóraǵasynyń orynbasary Seısembaı Jetpisbaev, «Ana tili» ortalyǵy» JShS-niń dırektory Sholpan Kınjıkova 2018 jyly birlese atqarylǵan mańyzdy is-sharalarǵa toqtaldy.

 Buqar jyraý atyndaǵy oblystyq ádebıet jáne óner mýzeıi, óner bóliminiń basshysy Bahathan Orazbek jáne Jumeken Nájimedenov atyndaǵy kórkemsóz oqý sheberleriniń respýblıkalyq baıqaýynyń 2-oryn ıegeri Aıbek Oralqanov sóz alyp, jastar atynan til bolashaǵyn arttyrýǵa jańa usynystar jasap, óz pikirlerin ortaǵa saldy.

Shara sońynda memlekettik til saıasatyn nasıhattaý men damytýǵa qomaqty úles qosqan azamattar QR Mádenıet jáne sport mınıstrliginiń jáne Til saıasaty komıtetiniń Qurmet gramotalarymen, sondaı-aq latyn álipbıinde jazylǵan dıktant qorytyndysy boıynsha úzdikter men respýblıkalyq konkýrstardyń jeńimpazdary basqarmanyń Alǵys hattarymen marapattaldy.