Pavlodarda qımaq jaýyngeriniń bas kıimi kórmege qoıyldy

PAVLODAR. QazAqparat - Pavlodarda Potanın atyndaǵy oblystyq tarıhı-ólketaný mýzeıinde Tereńkól aýdanynyń tarıhyna, ótkeni men búginine arnalǵan «Tamyry tereń týǵan jer» atty kórme ashyldy, dep habarlaıdy pavlodarnews.kz.

«Búgingi shara Nursultan Nazarbaevtyń «Bolashaqqa baǵdar: rýhanı jańǵyrý» baǵdarlamalyq maqalasyndaǵy «Týǵan jer» jobasynyń «Rýhanı qazyna» kishi baǵdarlamasyn iske asyrý aıasynda uıymdastyrylyp otyr. Aýdanda ólketaný jumystaryn júrgizý barysynda tabylǵan derekter men tarıhı málimetter, qasıetti oryndar týraly maǵlumattardy usynyp otyrmyz. Mysaly, Saıdilda qajynyń orny qasıetti dep tanylǵan bolatyn. Búgingi kórmege boıyndaǵy erekshe qasıetimen tanylǵan qajynyń jeke zattary ákelindi»,- deıdi Tereńkól aýdany mádenıet jáne tilderdi damytý bóliminiń basshysy Baqytjan Bektasova.

Byltyrǵy jyly 6 tamyzda Elbasynyń Jarlyǵymen aýdan ataýy Tereńkól dep qaıta atalǵan. Zertteý jumystaryn júrgizý kezinde Kachır aýdanynda Tereńkól bolysy bolǵan Іlııas Jankarın týraly derekter de kópshiliktiń nazaryna qoıyldy.

«Bizdiń aýdanymyzda qazba jumystary júrgizilgen bolatyn», - deıdi ol. - Sol kezde tabylǵan eń belgili artefakti - qımaq jaýyngeriniń bas kıimin osy jerden kórýge bolady. Budan basqa, ártúrli arheologııalyq eksponattar kórsetilýde. Aýdannan shyqqan Ekinshi dúnıejúzilik soǵysynyń batyrlary men respýblıka deńgeıinde tanylǵan tulǵalardyń jeke zattary qoıylǵan.

Eske sala keteıik, Saıilda (Shaıdolla) Túıtibekuly 1874 jyly dúnıege kelgen. 1908-1909 jyldary qajylyqqa barǵan. 1926 jyly meshit buzylǵannan keıin kópke barmaı dúnıeden ozǵan. El arasynda qalǵan ańyzdarǵa súıensek, kóne shaǵataı tilinde jazylǵan qoljazbalardyń kóbi ózimen birge jerlengen, birqatary jıenderinde saqtalǵan.