Pavlodarda qolqany atatyn jaǵymsyz ıis qaıdan shyqty
PAVLODAR. KAZINFORM - Sońǵy kúnderi pavlodarlyqtar qala aýmaǵyn múńkigen jaǵymsyz ıis jaýlap alǵanyna jappaı shaǵymdanýda. Keshkilik shahar ishinde munaı ónimderiniń ıisine keletin, qolqany atatyn sasyq ıis jaılap, turǵyndar páterleriniń terezelerin ashýdan qaldy. Budan keıbir adamdardyń bastary aýyryp, sozylmaly aýrýlary mazalap jatqanyn aıtady.
Bul turǵyda kópshiliktiń pikiri ekige jarylyp tur. Biri múńkigen ıis qalanyń Ónerkásip aýdany aýmaǵynan keledi dese, endi biri kóshelerge tóselip jatqan jańa asfalttan shyǵyp jatyr degen pikirde. Jalpy ıis munaı ónimderiniń ıisine keletinin aıtady turǵyndar.
Jurtshylyqtyń shaǵymyna oraı Pavlodar qalasy máslıhatynyń depýtattary óńirlik ekologııa departamentine jazbasha hat túsirdi. Onda turǵyndardyń jergilikti iri kásiporyndardyń atmosferaǵa qaýipti qaldyqtardy shyǵarýy boıynsha kúdigi bar delingen. Depýtattar soǵan oraı Pavlodar qalasyndaǵy aýaǵa monıtorıng júrgizýdi surady.
Al ekologııa departamenti óz kezeginde búgin kúndiz «Qazgıdromet» mekemesiniń fılıaly monıtorıngti bastap ketkenin málimdedi.
- «Qazgıdromet» fılıaly aýa sapasyn kúndelikti tekserýdi 7 statsıonarlyq meteopostta júzege asyrady. Onda atmosferalyq aýanyń sapasyn ólsheý naqty ýaqyt rejıminde úzdiksiz júzege asyrylyp keledi. Qala turǵyndarynyń munaı ónimderiniń ıisine qatysty kóptegen shaǵymdaryna baılanysty atmosferalyq aýa parametrlerin ólsheý úshin Ekologııa departamenti, Jer qoınaýyn paıdalaný, qorshaǵan orta jáne sý resýrstary basqarmasy, «Qazgıdromet» fılıaly mamandarynyń birlesken sapary uıymdastyryldy. Ólsheýler munaı óńdeý ónimderiniń shyǵaryndylarymen sıpattalatyn kásiporyndardyń sanıtarlyq-qorǵaý aımaǵynyń shekarasynda júrgizildi («Kompanııa Neftehım LTD» JShS, «PMHZ» JShS, asfaltbeton zaýyttary (ABZ). Derekterdiń durystyǵy úshin monıtorıng túngi ýaqytta jalǵasatyn bolady. Taldaý júrgizip, atmosferalyq aýany synaý nátıjesin alǵannan keıin naqty aqparatty qosymsha habarlaımyz», dep málimdedi departamentten.
Eske sala keteıik, buǵan deıin Aqtaýdy jaǵymsyz ıis jaılaǵany týraly jazǵan edik.